Mamit khawpui chawmtu tur tui lakna hnathawh mek Bialtu MLA-in a endik

Aizawl | March 25,2025: Mamit Constituency MLA Er. H Lalzirliana chuan Mamit khawpui chawmtu tur tui lak hna - Augmentation of Greater Mamit Water Supply Scheme Part-II (Clear Water) hna leh Pipe line chhe zual thlak mekte leh tui dahkhawlna Tanky siam mekte chu a hmunah kalin enfiahna hun a nei.

Augmentation of Greater Mamit Water Supply Scheme Part - II (Clear Water) hna hi Ministry of DoNER hnuai a North East Special Infrastructure Development scheme (NESIDS) atanga pawisa hmuh Rs 40Cr hmangin Gangwal Infrastructure Pvt Ltd ten he hna hi an thawk mek a ni. Pump house atanga pipe zam hian Mamit Bazar veng thleng tawh in, Mamit khawpui chhung pipe phum hna thawh mek bawk a ni bawk.

Hetihlai hian, Pipe line chhe zual lai thlak hna, AMRUT 2.0 atanga sum hmuh Rs 3.11Cr hmanga thawh pawh ngawrh taka chhunzawm reng a ni a, Mamit khawpuiin tui hnianghnar zawk a hmuh theihna tura hnathawh mek hi April 2025-ah chuan zawhfel hman tum a nih thu hnathawktute hian Bialtu MLA chu an lo hrilh a ni.

Bialtu MLA chuan Mamit PHED EE leh Staff-te thawhrimna fakawm a tiin an hnenah lawmthu a sawi a. Bialtu MLA hi Mamit PHED EE Pi Helen Saibuangi leh Contractor Naren Barmen Gangwal Infrastructure Pvt Ltd thawktu te bakah MNF Mamit Centre Block hruaitu ten an tawiawm a ni.