Heroin hawng 400 chuang man, Aizawl sumdawng lian inrawlh?

Aizawl | March 24, 2025: Heroin thahnem tak man chungchangah Aizawla sumdawng lian, First Cry neitu nia hriat leh a thurualpui man a ni.

representational pic:

Heng heroin hi hawng 440 niin, market-ah Vbch 220 chuang hu nia hriat a ni.

Mizoram Police chuan case no. Zokhawthar P/S No. 36/25 dated 14/3/2025 u/s 21(c)/25/29 ND&PS Act 2985 an ziak lut a. Mizoram Click-in a tarlan danin, heng mante hi Henry Lalbiakzinga Chhundeng leh a thurualpui Laltluangzela te an ni a. Damdawi hi Myanmar atanga tawlh niin, Champhai-ah man an ni.

Henry hi Star Cement Platinum Winner 2022 a lo ni tawh a, Mizo zinga hetiang chawimawina dawng hmasa ber nia hriat a ni.

March 13, 2025 zan khan Zokhawthar PS team New Hruaikawn Road-a mobile patrolling te chuan Bike pathum leh Champhai Taxi pakhat, MZ04B 0344 New Hruaikawn aṭanga Champhai pan mek te chu tidingin thu an zawt a. Hetia thil an zawh lai hian Taxi leh Bike pathum te hi thawklehkhatah chak takin Champhai lam panin an tlanchhe ta mai a. Police te hian um nghalin Taxi, Chhuansawmlala (18) s/o Paumuanthanga, Khuangphah khalh leh a mi phurh Vanlalhriata (21) s/o Lalpekruala, Zokhawthar, Taitesena Section te chu nangchingin man (apprehended) nghal an ni. Bike pathuma chuang, puitling pali leh kum tling lo pakhat te pawh a hnuah man an ni bawk.

Thu zawhfiahna aṭangin heng mite hian inthurualin a huhovin dan kalhin ruihhlo an tawlh ngei tih an inpuang a. Satha ip hring leh thawmhnaw ip dum chhungah heng ruihhlo hi dahin Taxi-ah hian an hlang ngei a, mahse Police duty an hmuh hnuah kawng thlangah an thehthlak thu an sawi. An inpuanna bawhzui hian March 14, 2025, 6:30 AM khan anmahni hruaiin an ruihhlo paih thlak hi zawn a ni a, Police duty-na hmun atanga 1.5 Km velah Heroin hawng 440 (Kg 4.722 a rit), tualchhung rate-a ₹1,41,66,000/- man hu man a ni ta a ni. 

He thila inhnamhnawih mi paruk – 1). Chhuansawmlala(18) S/o Paumuanthanga, Khuangphah, Champhai Dist, 2). Vanlalhriata(21) S/o Lalpekruala, Zokhawthar, Taitesena Section, 3). Zothansanga (20) S/o Lalpekliana, Zokhawthar, Taitesena Section, 4). Lallianmawia (19) S/o Lalhmangaihthanga, Zokhawthar Khuangchera Section, 5). Lalmalsawma (21) S/o Chhunglawma, Zokhawthar, Neuva Section leh 6). Zomuansanga (18) S/o  Rohlira, Bethel Veng, Champhai te chu dan angin man nghal an ni a, kum tling lo pakhat erawh JJB Champhai hnena hlan turin hren chhunzawm a ni. Zokhawthar PS Case No.36/25 Dt.14.03.2025 u/s 21(c)/25/29 ND&PS Act ziah luh a ni bawk.

He thil hi uluk taka chhui chhunzawm niin he ruihhlo tawlhruka inhnamhnawih mi pahnih :- 1). Henry Lalbiakzinga (34) s/o R. Malsawma, Dinthar, Aizawl leh 2). Laltluangzela (28) s/o Lalrosanga, Zokhawthar te pawh Dt.15.3.2025 khan Aizawlah man an ni bawk.

He case hi uluk taka la chhui chhunzawm zel niin, he ruihhlo tawlh ruknaa inhnamhnawih dangte pawh chhui chhuaha man tumin ngawrh taka hma lak chhoh zel a ni.

.