Thenzawl | January 22, 2025: Vawiin chawhma khan Thenzawl Vantawng Group YMA Hall ah ZPM Thenzawl Block huam chhunga VC Candidate tur puanna hun hman a ni a, he hun hmanpuitu bialtu MLA Pu Lalduhoma, Chief Minister chuan Kalphung thar Mipui Sorkarin kan ram rorelnaa Pathian ram a thlen theih nan leh Sorkar hmalaknain mipui tana hmasawnna tluantling a thlen theih nan Sorkar lai thawhpui thei tur LC/ VC Sorkarin a mamawh thu a sawi.
Pu Duha chuan,"LC/VC te hi Sorkar kut leh ke pawimawh tak an ni a, LC/VC tha nei veng leh khua chuan hmasawnna tam tak an khawtlang tan an chawlut thin a, chutih laiin Opposition LC/VC te zingah sorkar thawhpui hleitheilo an awm hian, Sorkar hmalaknain mipui a thleng zo lo fo thin a ni. ZPM Party chuan Pathian leh mipuite duhsakna changin Sorkarna kum khat zet kan chelh ve ta a, hmasawnna hna han thawh tak tak dawn chuan Sorkar lai thawhpui thei LC/VC an pawimawh zia a takin kan tawng chho mek a, kan ram rorelnaa Pathian ram tundina tur leh hmasawnna mipui thleng phak kan neih theih nan Sorkar thawhpui thei tur LC/VC kan mamawh hle a ni," a ti.
Pu Duha chuan,"Local Council leh VC inthlanah hian Ruling Party tan Candidate thlan a har thin hle a, mi tha tam tak leh Candidate awm tak tak an lo awm tawh vang leh rorel lai party thawhpui thei tur mi tha engemaw zat an lo awm ve tawh vang a ni. Chutiang dinhmun chu ZPM Party pawhin kan tawng mek a, kan hotuten Candidate tur atana an ruat apiangte thahnem ngai taka thawhpui turin Zoram dung leh vanga lungrualpuite kan ngen a ni," a ti.
He hun hi ZPM Thenzawl Block President Pu B.Lalhmangaiha'n a kaihruaia, Rev.VL Nithanga'n hunserh hmangin, Pu TBC Lalthanmawia General Secretary ZPM General Headquaters hnen atangin thusawi ngaihthlak a ni bawk. Thenzawl Block huam chhungah hian VC Area Pasarih awmin ZPM Party hian VC Area tinah Candidate tur an ruat kim vek a, Pu R.Lalnunfela Secretary Nomination Committe hnen atangin Candidate tur zawn dan tlangpui ngaihthlak a ni. Vawiin hian ZPM Tualvungi veng Unit atangin mi 20 leh kanan Unit atangin mi 40 lawmluh an ni a, Chief Minister hi ZPM General Headquarter LC/VC Election team te leh ZPM Thenzawl Block hruaitute bakah Unit hruaitu thahnem takin an tawiawm a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: