~ Zoa Tlau,
Buannel Cabin
23.01.2025 (6:44 AM)
YouTube khawvelin min chiah hneh viau! Kan buaipui lah a ho tual tual niin a lang. Kan 'society' hmasawnna tur leh ṭhanna tur lam aiin thil ho leh in bàwlna rawng kâi kan buaipui ta ber a nih hi!
Khawvel changkanna kan hum fer fur a, kan kutah thiltihtheihna tam tak a awm! Video cameraman kan ni thei a, editor kan ni thei a, 'content creator' kan ni thei nghal a, 'live' pe chhuak thei kan ni bawka chungte chu khawvel hmuha pholang nghal thei kan ni.
A tawi zawngin; video, cinema, cable tv news cameraman, Lammual inkhawmpui 'live' pechhuaktu ang kha, journalist, 'movie maker' director etc. etc. nih theih kan ngah ngang mai!
'Smart world'-ah i 'smart' em:
He 'smart world'-ah hian kan 'smart' tel lo a nih chuan heng chhuan hrang hrang (generation) ; Generation X 1965 leh 1979, Millennials 1980 leh 1994, Generation Z 1995 leh 2012, Generation Alpha 2013 leh 2025, tunah Generation Beta 2025 aṭangin te zîngah hian tuar fe fe an awm dawn! Z, Alpha leh Beta te ngaihtuah chung reng hian i 'smart' hrâm hrâm teh ang u.
'Smart phone' avang hian kan 'smart' lo tial tial a, kan tuipui a nêp tulh tulh a, kan sûkthlekin ram ropui a kawk ta meuh lo! Pawltea, Piangtea, Edena leh Zonuni te nupa inhau te vel hi kan 'society' sèp rawtui ber a nih chhûng chuan 'chhuan' lo la awm zêl tur te tan hian entawntlâk kan awm lo palh ang e! Pawnven i sawichhing teh ang u.
Aizawl Treasury Square Court Road vela cyclostyle hunlaia chanchinbu inchilh tlat, a kawma 'Ramhuai an hmu' tih vel thupui mak deuh deuh inziak, han leia chhiar tlak tak tak awm leh si lo nunah khan lêt tawh lo hrâm ang u khai!
'Social media':
Kan 'social media' hman dan hi kan chhût nawn fo a ṭul ta viau mai. Nu leh pa pawhin kan fa te kan enthlak reng a hun takmeuh meuh a ni. A tâwka nun, pi leh pu te hun ata tawh inzirtirna ṭha kan neih te kha a la 'tunlai' reng a ni tih hriat a ṭul.
Tute emawin an thinur leh an nun pawlawh tak an pholanna hi a tam ta êm êm a, Mizo zingah pawh a tam. Kan en tur bik te, naupang hmuh tur bik kan thliar hran thiam a pawimawh ta hlê a ni. TV show te pawh nu leh pa ten en phal bik te an nei ṭhin angin kan inkhuahkhirh ṭhat a ṭul.
Phone-ah hian 'screen' hman hun chhinchhiahna dah vek a ni a, hemi aṭang pawh hian nu leh pa te pawhin fa te emaw, tu te emaw khuahkhirh dan chintawk a siam theih a ni. Zalêna insiam chu a ṭha, mahse a chintawk a awm tih hi 'chhuan' lo la awm zel tur te hian an hriat a ngai ve tlat!
Tlipna:
Aw le, a sei dawn ta mah mah, duhtawk phawt ang. 'Comment' lamah rawtna pawimawh tak tak lo dah hrâm teh u. Hei hi tunlai chu veitu an tam riau a nia, kan rin aiin 'smart phone' khawvel hian min nghawng thui tawh ang.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: