"Labour-te bana kaih dan kan duang,"

Aizawl | Jan 31, 2025: LESDE Minister Pu Lalnghinglova Hmar chuan, Mizoramah labour-te chawi kanna turin Mizoram Building and Other Construction Workers Welfare Board (MBOCWWB) kaltlangin bana kaih (handholding) an kalpui dawn tih Union Labour Minister leh India rama Labour Minister dangte hmaah a sawi.

January 29 & 30, 2025 khan New Delhi-a Ashoka Hotel-ah India rama state leh union territory hrang hranga Labour Department changtu Minister, Secretary leh official-te inkhawmpui neih a ni a, Pu Lalnghinglova Hmar hian thu a sawi bakah January 29 tlaia session hnuhnung ber inkhawm a kaihruai a ni.

LESDE changtu Minister chuan, "Labour chungchangah hian kan thusawi a inthlau khawp mai a, state lianin mihring nuai mai ni lo maktaduai bia thil in sawi laiin Mizoramah chuan nuai bi pawhin kan sawi thei lo a, hnathawktute tana sum khawn khawm (cess collection) pawh in sawi leh kan sawi a inthlau hle. Hei vang hian state lian leh state te zawk min hrut rual vek loin kan state mila kan kal theih dan ngaihtuah a ngai a ni," a ti.

Union Labour Minister Dr. Mansukh Mandaviya hnenah thu thlenin, "State lian zawk tih ang zawng zawng kan ti thei lo a, chutih laiin keimahni milin dan bawhchhe si loin dan pawh fân min phalsak ula, BOCWWB hnuaia pawisa awmte hman kawngah pawh Mizoram mila kal kan duh a ni," a ti.

Pu Lalnghinglova Hmar chuan MBOCWWB meeting hnuhnung berah labour-te hmasawnna tura an bana kaih dan an duan thu leh hmang țan tura an inbuatsaih mek thu a sawi a, education lamah pawh nasa zawka ke pen tum a nih thu a sawi.

Labour inkhawmpui lianah hian India ram state leh union territory hrang hrang ațangin Minister leh Department hotute an tel kim hle a, India rama labour-te dinhmun chawi kan dan tur leh khawvel hmasawnna mila inher rem zel dan turte zir a ni.