PATHIANIN A SAWI ANGIN A THU AWIH RAWH

_Hnuhma Chhinchhiahtlak Hnutchhiah_

By Rick Warren 

—Dec 10, 2024

“Rinnain Nova chu thil lo la lang lote kawng thu-ah Pathian hrilha lo awmin, Pathian tih dekin, a chhungte chhandam nan lawng a tu a.” Hebrai 11:7

Rinna chu i hriatthiam loh thil pawh i awih phawtna hi a ni. Thuthlung Tharah hian thupek 1050 lai kan hmu a, chung zawng zawngte chu i thatna tur vek an ni.

Pathian chuan thil inkawkalh ang deuha lang te a sawi fo thin, entirnan, “I hmelma hmangaih rawh” tih leh “Nangmah tinatu che ngaidam rawh.” A awlai lo a ni! Bible-a thupek hrang hrangte hi harsa, awmze nei lo, a tak ang lo leh tihhlawhtlin theih loh ang hialin a lang a ni. A chang chuan hetiang zawngte hian a sawi a, “Nupa nun chu inneih hnuah a ni tur a ni,” tih te. A sawina chhan zawka chu, nangmah aiin i tana tha tur leh eng hi nge i hlimna tur tih hi a hrechiang zawk a ni. 

Pathianin tih tur a pek apiang che hi chu, rinna fiahna zel a ni. Zawhna awm chu hei zawk hi a ni: Pathian i ring em, nge i thiamna i ring zawk? Pathian Thu i ring em, nge khawvel thu hi i ring zawk? 

I awih ang em?

Naupang i nih lai khan i nu leh paten thil awm anglo deuh te ti turin an ti che em? “Hei hi engvangin nge ka tih ang?” tiin i chhang mai thei e. An chhan dan tur chu, “Ka sawi avangin!” an ti ang. I nunhlui kha chhui kir la, i nu leh paten an tirhna cheah hnial deuh chung pawha i tih tho avanga i inchhir lohna a awm nawk ang. Chuta tang chuan an finzia i hre thei ang?

Nova ang chiah hian, Pathianin i dam chhunga i hriatthiam loh tur thil a la tihtir dawn che a ni. Kum 80 i nih hnuah, Pathianin “chumi chu ti rawh” ti che se la. Nang chuan, “awmzia a nei lo” tiin chhang ta la. Pathianin “ka sawi avang ti rawh” a ti tho ang che.   

Chutiang dinhmuna i awm chuan fiahna a ni. Rinna chu i hmuh loh pawha i awihna hi a ni a, i hrethiam lo chung pawha thu i awihna hi a ni bawk. Thuawih i zir loh chuan, Pathianin malsawmna i dawn tur a dahte pawh i chan thei a ni.  

Pathianin ti tura a duh che chu zawt buai lo va i tih chuan, nunphung pangngai ang lo deuh pawhin lang mahse, rinna kawngah i thang anga, malsawmna i dawng bawk ang.

Ngaihtuah zui atan

* I nunah Pathianin ti tura a tih che tihtheih loh ang hiala lang si chu, rinnaa ti tura ke i pen hnuah, Pathianin chu hna chu a thawh zawhtir leh si ang chi i tawng tawh em?

* Nangma chakna hmanga i tihtheih loh tur ang chi hi Pathianin engvangin nge ti tura a tih che nia i hriat?

* I nuna eng thilah nge zawhna zawt buai lo va Pathian thu awih mai ngai nia i hriat? Vawiin hian a pumhluma Pathian thu i awih theih nan eng rahbi nge i rah dawn le?  

*[Lettu: Sangpuia]*