MSU hruaitu tharte'n mawhphurhna an la tan; "Zirlai Pawl rintlak siam turin theihtawp kan chhuah dawn,"

Aizawl | December 6, 2024: Mizo Students Union (MSU) General Headquarters, Aizawl hruaitu thar thlante chuan vawiin tlai dar 2 khan mawhphurhna an la tan a. MSU President B Lalkhawngaihzuala chuan, "Zirlai Pawl rintlak siam turin theihtawp kan chhuah dawn," a ti.

Hruaitu hlui leh tharte mawhphurhna inhlanna hun hi Adviser rorelna hnuaia an awm avangin Adviser ten an kaihruai a, mawhphurhna pawh an hlan a ni.

November 29 khan MSU General conference leh General Election neiin Mizo Students Union (MSU) General Headquarters, Aizawl hruaitu thar thlan an ni a. MSu hruaitu tharte hi President B Lalkhawngaihzuala, Chanmari, Vice president Roluahpuia Ainawn Veng, General Secretary Samuel Lalruatdika Chanmari, Assistant General Secretary Lalruatpuia Bawngkawn, Treasurer Lalrampanmawia Salem Veng leh Finance secretary Lalhmangaihzuala Edenthar veng te an ni.

MSU President thusawi:

MSU hi kum 2001 atang khan zirlaite, ram leh hnam tan mei mit lovin vawiin thlengin chak takin a la kal zel a. Hruaitu hmasate kan en letin, ram leh hnam tana an inpekna te ropui kan ti a. Tlinglo tak chunga an hnung zui tur leh an rawngbawlna chhunzawm thei tura he dinhmuna min hlangkaitu min duhsaktute zawng zawng chungah lawmthu thinlung takin lawmthu kan sawi a ni.

MSU hi Zirlai pawl kan nih angin a tam berah 100-a 80-ah zirlaite tan hna kan thawk thin a, a bak 100-a 20 erawh ram leh Hnamin min mamawhna apiangah kan che chhuak thin a ni.

Khawvel awm chhung zawngin zirlaite chu an awm zel dawn avangin an tana ding tur an awm angai a. Zirlaite chuan an zirna kawngah harsatna tam tak an tawh thin avangin.heng harsatna te su kiang tur chuan Zirlai pawl rintlak a awm angai a.Chu Zirlai pawl rintlak Siam tur chuan keini MSU hruaitu thlan tharte hian theihtawp kan chhuah tlat dawn a ni.tin, mizo zirlaite hian kan hnam a boral lohna turte, kan hnam zia kan chawinun zel nan te, hnam hmangaihna nei chunga kan zirna kawng kan zawh a tul takzet a.hemi tura kan inhruai hi thil pawimawh tak a ni bawk.

Tun term lo kal turah hian hei leh chen min kaihruaitu Pathian rawn chung zela kal kan tum tlat a. Sawrkar nen pawh zirlaite tana hna kan thawh na tur kawngah thawhhona a tha thei ang ber neih kan duh a, chutihrual erawh chuan kal dik tawhlohna an nei a nih erawh chuan khalh ngil turin theihtawp kan chhuah dawn thung a ni.

Hun kal tawha kan lo famkim lohna te, kan kal dik tawklohnaah te Mizoram mipuite chungah pawl aiawhin ngaihdam kan dil a, vawiin atang chuan rintlaka awm kan tum tlat tawh avangin kan rawngbawlna zawng zawngah kan Lakna rinna nghat ngam turin mizoram mipuite kan sawm tak meuh meuh a ni.