Home Minister in Kolasibah Hathkargha Mela -State Handloom Expo a hawng

Kolasib | December 3, 2024: Vawiin khan Hathkargha Mela-State Handloom Expo, Kolasiba Taitesena Hall, Venglai a buatsaih chu Pu K Sapdanga, Home Minister, Mizoram chuan a hawng.

He hunah hian Khuallian Home Minister K Sapdanga chuan thu sawiin, Sawrkar chuan mipuiten mahni kutkawih a eizawnna an neih theih nana tanpuitu atan PSU thenkhat te chu a kaitho leh a ni, a ti a. Zohandco chu sumdawnga sum siam nghal tu tur ni lovin a tam thei ang bera zo faten mahni a eizawnna an hmuh theih nana hmahruaitu leh zirtirtu tur an ni, a ti. Mahni kutkawih a eizawn a pawimawh zia sawiin, 'Leilung nena inzawm eizawnna a tamna apiangah ram a hausa thin a ni,' a ti. Sawrkarin a kalpui mek Banakaih Policy pawh Ban a kai tur chuan ban lo phar ve angai a ni, a ti a, chuti lo chuan kaihna tur Sawrkar in a hre dâwn lo a ni, a ti.

K Sapdanga chuan hna zawn ringawt ni lova hna siam tumna rilru kan put angai a ni, a ti a. Hlawhtlinna chu College leh University Degree ah ringawt in nghat lovin rinawmna leh taihmakna ah a awm zawk a ni, a ti. Zohandco pawimawhna sawi chhunzawmin, Kan Mizo kut ngei hmanga thiam thil chi hrang hrang inzirtir a mahni a eizawng thei turin min zirtir a ni, a ti a. Vawiin a an Exhibition neih chu thlir liam mai lova engtinnge he Exhibition hmang hian hlawkna ka neih ang tih kan in ngaihtuah a ngai a ni, a ti.

Handholding in a tum ber leh a ngaih pawimawh ber pawh Thalaite rilru a taihmakna tuh a, mahni kut ngei hmanga mahni ei tur thawkchhuak tura inzirtir a ni, a ti.

Zohandco Board of Director Vanlalmawia pawhin thu sawiin, Vawiin a Mela an hman mek chu Ministry of Textile Development hnuaia National Handloom Development Program in a Sponsor a ni, a ti a. Zohandco chu State Sawrkar in Handloom leh Handicraft Development na atana a kutke atana din an nih thu sawiin, awmze nei zawk leh nakin atana Handloom hmasawn chhoh zel dan tur ngaihtuah an nih thu a sawi.

Vawiina Home Minister in State Handloom Expo - Hathkargha Mela Kolasiba a hawn hi December ni 3 atanga ni 18 thleng awh tur a ni a. He Mela hi Zohandco hnuaia buatsaih niin, Mizo kutchhuak puan leh inthuamna lam chi Taitesena Hall chhunga dawr hrang hrangah pho chhuah a ni. Vawiina Kolasiba a hawnna ah hian Sawrkar Official-te, dawr neitute leh mi thahnem tak an tel a ni.