MI FING CHUAN ZAWHNA AN ZAWTA, AN NGAITHLA ṬHIN

_I Nun Kal zel Atana Pathian Hmathlir_

By Rick Warren 

— Nov 20, 2024

“Remruatna chu mihring thinlungah tui thuk tak ang a ni a; Nimahsela hriat thiamna nei chuan a phawrh chhuak ang.” Thufingte 20:5

Mi fing nih i duh chuan, zawhna fing zawh dan zir rawh.

Thufingte 20:5 chuan, “Remruatna chu mihring thinlungah tui thuk tak ang a ni a; Nimahsela hriat thiamna nei chuan a phawrh chhuak ang." Ṭawngkam danga sawi chuan, tu te pawh hian zirtir tur an nei che a ni. Tui thuk taka mi i la chhuak angin an finna i la thei ang - hun duh deuh mahse a hlu em em thung si a ni.

Finna chu engtin nge i haichhuah tak ang? Zawhna fing tak zawh dan zir ang che.

Ram hrang hrang ka fannaah hian, taxicab khalhtu leh prime minister te thlengin zawhna ka zawt ve a — engemaw tak chu min zirtir ṭheuh a ni. Zawhna dik tak i zawt fuh a nih chuan, tute hnen aṭang pawhin i zirchhuak thei ang.

Thil pakhat ka hriatchhuah chu keimah ka ṭawng chuan engmah ka zirchhuak lo tih hi. Ka kâ ka ân chhung chuan engmah ka zir thei lo a ni. I ṭawng chhung ai mah chuan, i ngaihthlak hian i zirchhuak zawk a ni. Chuvang chuan ngaihthlak dan zir rawh.

American TV host ṭhin Larry King khan hetiang hian a sawi a: Interview show-ah, a kawmtu ber hun zatve lai a ṭawng chuan, thil fel lo a awm a ni. A kawmtu hi a ṭawng tam tur a ni lo, a ngaithlatu-ah a awm zawk tur a ni. Mi kawmtu fel chuan zawhna a zawt ang a, a ngaithla ang.

Vawi engemawzat chu min lo kawm ve tawh ṭhin a, chuta ka hriatchhuah chu mi tam zawkin Larry King-a thurawn hi an ngaipawimawh lo a ni. Mi kawmtu tam zawk chuan an mi kawma te ngai pawimawh lo vin anmahni an in ngaipawimawh zawk tlat ṭhin a ni.

I nunah chuan, mi dang ngaithla tura inpe mi ni ang che. Mi tu hnen aṭang pawhin engemaw tal i zirchhuak thei a ni tih ring ang che.

Zawhna ṭha tak zawt turin inpeih la - tichuan ngaithla ang che. Chutichuan mi fing i ni mai ang.

Ngaihtuah zui atan

* Nilengin ṭawngtu ai chuan ngaithlatu nih tum ang che. Engnge danglamna a thlen le?

* Mi zawhna i zawh hnuah tuina neiin chu chhanna chu i ngaithlaa, eng nge i zirchhuah le?

* Mi dang hnen aṭanga finna pawchhuak turin zawhna fing tak i zawh a ngai. Mi tuemaw hnenah zawhna fing tak i zawh chak engnge le?

*Zawhna fing tak pakhat chu, i thih huna i kalna tur i chiang tawh em?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

[Lettu: Sangpuia]