ZPM Sorkar hi Sorkar tla tur buai nuai ang mai an ni

ZPM Sorkar hi Sorkar tla tur buai nuai ang mai an ni - Lalruatkima

Aizawl | October 22, 2024: MNF Treasurer Lalruatkima, Ex Minister chuan vawiin leh nimin khan Chalfilh bial khaw hrang hrang - Sihfa, Phullen, Phuaibuang, Khawlian, North East Tlangnuam leh Daido-te a tlawh a. Heng hmunah te hian Party mite nen inkawmhona hun ṭha tak an hmang ho.

Heng hmunah te hian Ex Minister Lalruatkima chuan thusawiin, "Zoram pumah kawng a chhe em em a, Aizawl khawpuiah ngei pawh kawng an siam ṭha hlei thei lo. Kan kawngpui ber, kan chaklakna kawng an siam ṭha hlei thei lo a, kawng hrang hrangin harsatna kan tawk mek a. Petrol leh Diesel man a sang a, lirthei neitute an nuar dawn mek a. Zirlaite Midday meal pawh an pe hlei thei ta lo. Mipui vantlangin ration card kan neih card var lah nise letin, kg khat cheng sawmthumah an tisang a. Kawng hrang hrangin Zoram hi a buai nuai mai a ni. Neutral te an beidawng tawh em em a ni. Kum khat em pawh an la sorkar hmain sorkar tla tur hun tawp lam hmang ang mai a ni, kawng tinrengah an buai nuai mai a ni," a ti.

MNF Treasurer chuan, "Enchhin a zawnga enchhin fuh lo ber Zoramin kan tawng a ni, tih hi neutral mipuite ngaihdan a ni. Rei lote kan enchhin chhungin mipui kan beidawng der tawh a ni," a ti a. "Kan puk ve lovang, an tih sum te lah chu vibelchhe 2800 dawn an puk tawh a, a uai rit tawh hle a ni," a ti bawk.

Ruatkima chuan, "MNF kan tho leh dawn, kan hliam hluite dam rawh se. Kan tihsualte siamṭhain Zoram tan MNF a lo tho chhuak leh dawn. Pathian leh kan ram tan titu MNF hi Pathian vangin a dingchhuak leh dawn. Vawiina kan CM Pu Lalduhoma'n a lo sawi tawh angin, MNF hi zalenna sualtu party kan ni a, Mizo hnam a awmchhung chu a ral dawn lo. MNF a dingchhuak leh dawn," tiin kalkhawmte a chah bawk a ni.

Lalruatkima hi MNF GS Lalremruata Chhangte leh MNF hruaitu engemaw zatin an ṭawiawm a ni.