Mimal rinawmna rah hi ram leh hnam tan malsawmna a ni

Kawnpui | October 19, 2024: Vawiin khan Home Minister Pu K Sapdanga chuan Tuirial constituency chhunga khaw thenkhat Kawnpui, Hortoki, Mualkhang, Khamrang leh Kawnpui Police Out Post te a tlawha, heng hmun hrang hrangah te hian thusawina a hman bakah, khawtlang hruaitute nen khawtlang mamawh hrang hrangte an sawiho.

Pu K Sapdanga chuan, "Kan ram leh hnam dam lohna pakhat chu rinawmna kan hloh thin hi a ni a. Tunhma chuan zofate hi hnam rinawm, kawngka kalhna a tan pawha thingfak hmang mai thin kan ni a, khawvel hmasawnna leh changkannain min luh chhuah hnu hian Sorkar pisa-ah te, ram enkawlna kawngahte, khawtlang inrel bawlnaah te, mahni hna zawn theuhah te rinawmna in hmun a chang tlem ta hle a, tan lak kan ngai ta hle a ni. Kohhran huanga kan rinawm viau lai hian sorkar hna leh sorkar thil a nih chuan kan inthlahdah leh thin hi a pawi tak zet a, kalphung thar mipui sorkar chuan 'Ram rorelnaa Pathian tam tundin' kan tum avangin mipuite pawhin kan nitin nun leh midangten min hmuh phak loh chinah pawh Mizo kan nih ang leh Kristian kan nih angin rinawmna kan vawng tlat tur a ni. Rinawmna hi chhungkua, khawtlang, Ram leh hnam tan tan malsawmna a ni a, chu malsawmna dawngtu tur pawh chu keimahni bawk kan ni," a ti.

Home Minister chuan, "Sorkarna kan chelh hnuin Home Department chhungkuaah pawh tan kan la nasa hle a, kalphunghluia hun rei tak kan lo kal tawh avangin department chhungah pawh siamthat ngai thil tam tak a awm a, kan insiam rem mek a ni. Rinawmlohna ram leh hnam tan a pawi em em a, mipuiin an tuar bawk thin a ni. Tin, mi fel tak tak karah mi inthlahdahte avangin kan lo hming ṭhat tawhna te pawh thai rehin a awm phah ṭhin. Heng mi inthlahdah, mi rinawm lo te hi sorkar chuan a thian thianghlim nual tawh a, an chungah thununna kan lek zel dawn a ni', a ti. "Ruihhlo avangin kan ram a rum mek a, chhungkaw tamtak kan ṭap a, kan ṭhalaite nunna pawh a hek hle a ni. Mizoram hi ruihhlo tawlhna kawngpui pakhat a ni a, hei hi sorkar thar chuan a ngaimawh tak zet a, Central YMA pawhin theih tawp a chhuahin ruihlo do kawngah hma a la mek a, sorkarin a chhinchhiah bikah, kumin chhunga ruihhlo mân ringawt pawh cheng vaibelchhe 160 chuang man a ni tawh. Hetiang zela Mizo ṭhalai, a bikin Mizo mipate ruihhlo bawiha kan tan chhoh chuan kan hnam hi a ral zawngin a kal zel ang tih a hlawuhthawnawm hle a, tlawmngai pawlte, Kohhran leh Kohhran ṭhalaite, tumah inthlahdah lovin ṭang ho zel turin ka sawm che u a ni," a ti. "A bikin chhungkaw nu leh paten mahni chhungkua ṭheuh uap lum thar leh i la, chhungkaw inrelbawlna fel hi kan ram hian a mamawh hle a, heti lamah hian tan i la thar leh ang u," a ti bawk.

Home Minister hian Kawnpui leh Sairang inkara kawngchhiate tlawh nghalin thawktute hnenah chak leh zuala hnathawh dan turte a sawipui bawk.