Hunpui vuakvetah khauh takin Halpuah leh halmawi khap tum!

Krismas leh Kumthar vuakveta Halpuah leh Halmawi chungchangah Aizawl Khawpui Chhung Branch YMA Hruaitu Inrawnkhawm

Aizawl | October 18, 2024: Ni 17.10.2024(Ningani) zan khan Dawrpui Multipurpose Centre-ah Krismas leh Kumthar vuakveta Halpuah leh Halmawi chungchangah Central YMA chuan Aizawl khawpui chhunga Branch YMA hruaitute inrawnkhawmna a buatsaih a. He hun hi Pu Lalhmachhuana, President, Central YMA in a kaihruai a, Pu RL Zomawia, CEC in hunserh a hmang.

Prof. Malsawmliana, Gen. Secretary in inkohkhawm chhan leh he huna kal te inhmelhriattirna hun a hmang bawk.

Prof. Lalnuntluanga, Vice President in inkohkhawm chhan a sawi hawng a. Krismas leh Kumthar vuakveta Halpuah leh Halmawi hal that loh zia leh a nghawng te, YMA Branch te thahnemngai taka tan tlan a tul zia te a sawi a. Halpuah leh halmawi khap chungchang ah hian YMA chuan Sawrkar hmalakna a thlawp thu leh mahni Branch huamchhung theuh ah he hmalakna hi Branch YMA tinten chak taka hmalak leh hi kan tihtur anih thu a sawi. Naupang kum tling lo zan len khuahkhirh a tul zia leh hei hian khawtlangah sualna a tih punlun dan te, tleirawl insual rawn a hluar dan te a sawi bawk. Insualrawn thleng fo hi ruihtheih thil tih avanga lo thleng a ni.

He hun hman puitu Pu K. Sapdanga, Home Minister chuan dan leh thupek hmanga halpuah leh halmawi khap tur hian Sawrkar chuan khauh taka hma a lak tur thu leh Sawrkar hnathawk inhnamhnawih chu hrem an nih tur thu te, Sawrkar hmalak tum dan te a sawi a. YMA te nena thahnem ngai taka kan tanrual chuan a hlawhtlin ngei a beisei thu a sawi. A hlawhtlin theihnan YMA hruaitu leh Member zawng zawngte thawh pui turin a sawm a ni. Beidawng lo turin a chah. Halpuah leh halmawi hi Kumthar lawmna chhe ber a nih thu a sawi a, Krismas vuakveta YMA Branch Duty te thingpui inna tur Sawrkar atangin ruahman a nih tur thu a sawi bawk.

Kalkhawmte atangin zawhna hrang hrang zawtin sawihona hun hman a ni a, heng zawhna te hi Aizawl DC Et Lalhriatpuia leh Pu H. Ramthlengliana DIG (NR) ten an chhang a ni.

He hunah hian Aizawl khawpui chhunga YMA Branch hruaitu 500 chuang an kal.