Adviser to CM-in Keilungliah Pedal Boat Service a hawng

Champhai, 16th October 2024: Adviser to CM, Champhai North bialtu MLA Er. H. Ginzalala chuan vawiin khan Keilungliah Dam, Champhaiah Pedal Boat Service a hawng.

Er. H. Ginzalala, Adviser to Chief Minister chuan Keilungliah Dam hi sawrkar hmasa pahnih te bulṭan leh hmawr bawk a nih thu sawiin, sawrkar kal ta te thawhrimnaah lawmthu a sawi a. Pedal Boat Service bulṭan nan lawng 4 dah phawt a nih thu sawiin, chetsualna a thlen palh chuan an hmathlirte a tihchhiat vek theih avangin fimkhur taka enkawl a tul thu a sawi a. Keilungliah Dam chu Champhai ti Champhai tu a la nih chhoh zel dawn avangin ngaihtuahna thar nen tihhmasawn zel tum a ni tiin khualzinte hipna pawimawh tak a nih theihna tura buatsaih zel tum a nih thu a sawi. Champhai District-a khualzinte tlawh tur hmunhma te chu Swadesh Darshan kaltlanga changtlung taka siam chhoh tum a nih thu pawh Er H. Ginzalala hian a sawi a, Keilungliah Dam-ah hian Speed Boat pawh dah leh tum a nih thu a sawi bawk.

Er. H. Ginzalala chuan Keilungliah Dam tlawhtute tan Restaurant te, riahna tur te, leh venhimna lam te a hmunah dah ala nih tur thu sawiin hmalakna tur hmachhawp an la neih hrang hrangte he hunah hian a tarlang a ni.

He hun hi Pu SN Lalrammawia kaihhruainain Keilungliah Dam, Pentagon Glass House tualah hman a ni a. Pu Vanlalhuma chuan hunserh a hmang a, Pu Lalrinawma bakah Keilungliah Management Committee te hnen atangin thusawi ngaihthlak a ni bawk.