Youth Services Minister hovin National Cadet Corps (NCC) State Advisory Committee thukhawm

Aizawl | September 21, 2024: Nimin chawhnu dar 1:00 khan SAD Conference Hall-II, MINECO ah National Cadet Corps (NCC) State Advisory Committee chu an chairman Sports & Youth Services Minister of State Lalnghinglova Hmar, hovin an thukhawm a, Mizoram-a NCC hmasawn theih dan tur hrang hrang an sawiho. Meeting-ah hian Brigadier Kapil Sood, Group Commander, Silchar Headquarters pawh a tel a ni.

Meeting-ah hian Col SS Kalia, Commandant, 1 Mizo Bn. in Powerpoint Presentation hmangin NCC chanchin tlangpui leh Mizoram-a NCC Battalion te dinhmun, achievement leh hmathlir an neih te a tarlang a. Hemi hnu hian Aizawl-a NCC Group Headquarters din chungchang leh NCC hmasawnna tura hma lak dan turte sawiho chhunzawm a ni.

Nimin-a meeting chuan zirna in leh zirlaite zingah zau zawka NCC chungchang zirtirna kalpui dan ngaihtuah nise tiin a rel a. Zirna leh Sawrkar hna-ah NCC Officer leh Cadet te tana hamthatna (incentive) awm thei te sawiho a ni bawk. Sports & Youth Services Department-a thawkte bakah Sawrkar department dang – School Education Department, Higher & Technical Education Department leh Mizoram University te nen thawhho dan ngaihtuah nise tiin meeting chuan a rel a ni.

NCC hi kum 1917 ah University Corps ti a din tan niin, kum 1948 ah National Cadet Corps Act hnuaiah NCC ti a thlak a ni a, tun dinhmunah khawvela ‘uniformed youth organisation’ lian ber a ni nghe nghe. Mizoram hi Silchar Group Headquarters hnuaiah awmin battalion pali - 1 Mizo Bn., 20 Mizo Bn., 1 Mizo Air Squadron leh 2 Bn Mizo te a awm mek a ni.