Aizawl | September 19, 2024: Mizo Inchaipui kan tih mai thin, Mizo Inchai Title Fight, 2024 Mizoram Wrestling Association leh LPS Vision Production te nen tangkawpa kan neih tur niin ni December 9 -11, 2024 ah LPS Arena, Falkland a neih tura ruahman a ni a. Ruahman lawkna anga a kal a nih chuan zan dar 8:00 ah inchai hi tan thin a ni dawn a ni.
Mizoram Wrestling Association hruaitute chuan vawiin chawhnun khan Aizawl Press Club-ah thuthar thehdarhtute kawmin he thu hi an puang chhuak a ni.
Weight tina Champion te hian Title Belt bakah sumfai an hlawh dawn a. Palian Champion laiin cheng nuai khat a hlawh anga, challenger in cheng singnga(Rs.50000) a hlawh thung dawn a ni. Palaihawl, Pate, Nulian, Nulaihawl, Nute chak zawkin Rs.50000 an hlawh anga, a chak lo zawkten Rs.30000 an hlawh dawn bawk. Tin, Exhibition Match paruk a awm dawn a, hengte hian Rs.5000 an hlawh vek dawn a. Title Fight lawmman senso zawng zawng hi Rs.6,10,000 a tling a ni.
Tun tum Mizo Inchai Title Fight-a inchai chakte pawisa hlawh tur hi LPS in an tum dawn a. Tin, kumin atangin Title Fight a tel hmeichhe Champion tan Belt siam thar a ni. Kum 2011 atanga Title Belt lo chhawp chhuah thin chu a thara thlak a ni dawn bawk a ni. Heng Champion Belt te hi ‘Samoo’ dawr, Dawrpuite chuan a sponsored a ni.
Mizo Inchai Title Fight a inlan tur zawng zawngte hian Mizo Inchai danpui, Title Fight dan bik, Danpui No.7 na in a phut angin MWA nen inremna leh intiam kamna an ziak vek bawk
a ni.
Tin, Mizo Inchai Champion lai cho theitute hi danpui, pahnihna in a phut angin heng mite hi an nih angai a.
(a) Palian Champion cho thei tur chuan 80 Kg. chin chunglama rit an ni tur a ni.
(b) Palaihawl Champion cho thei tur chuan 65 Kg. atanga 80 Kg. inkara rit an ni tur a ni.
(c) Pate Champion cho thei tur chuan 65 Kg. chin hnuailama rit an ni tur a ni.
(d) Nulian Champion cho thei tur chuan 70 Kg. chin chunglama rit an ni tur a ni.
(e) Nulai hawl Champion cho thei tur chuan 60 Kg. atanga 70 Kg. inkara rit an ni tur a ni.
(f) Nute Champion cho thei tur chuan 60 Kg. chin hnuailama rit an ni tur a ni.
Danpui pathumna in a phut angin Champion lai chotu turte hi - Mizo ngei an ni tur a ni a.
Champion nilai chotu an tam chuan an zing atangin a chak ber zawn tur a ni. Champion nilai chotu an awm lova MWA in tul a tih chuan inchaia tel ngai lo pawh training pek hnuah a dinhmun azirin MWA-in chai a phalsak thei ang tih a ni a. Champion nilai chai leh chai loh thuah MWA-in thutawp a nei ang, tiin danpuiah tarlan a ni.
Mizote hi mi chak ngaina leh ngaisang hnam kan ni a. Ka pipu te hun atanga tun thlengin mi chak, tharum ngahten ngaihsan an hlawh a. Kan pipute kha ral leh Sa hlau reng renga awm an nih avangin khawtlang mipuite thlamuan turin Pasaltha, michak an nei thin. Thangthar khawvelah Mizo michakte lansarhna hun Inrun leh Indo a tawp a, ral hlauh leh Sahrang hlau reng renga hun an hman a tawp a. Khaw kar kawngah mi ruang zawn inchuh a awm ta lo. Mizote thinlungah michakten hmun an la luah reng a, Zawlbuk chhunga inbuan mai duhtawk lovin michakte lansarhna turin tunah chuan Mizoten dan bik a neih, Mizo infiamna bik, Mizo Inchai chu chhawp chhuah a ni thin ta a ni.
Kum 1971 ah Mizoram Wrestling Association din a ni a, kum 1972 atangin Mizo mi chakte chawi larna turin incho leh incho in Inchai buatsaih thin a ni a. Tun hma lam kha chuan thiamna thuk tak an nei lova, a chak zawk, tharum ngah zawkte kha an dingchang mai thin. Hun a lo kal zel a, Mizo Inchai chhungah infiamna hrang hrangte nen belhbawmin inchai chakten chak zawk an lo zawng chho thin. Tharum ngah leh chak kha chak zawk teh nan hman a ni ta lova, thiamna nei bikte chuan chungnung zawkna an neih tak zel avangin tun hunah chuan tun hmaa Mizo inchai leh tun hnua Mizo inchai chu danglam tak a ni tawh a ni.
Tarlan tawh angin kum 1972 atangin kum 2022 thleng khan Mizo Inchai Palian Champion zawnna vawi 22 lo huaihawt tawh a ni a. Hemi hun chhung hian mi 10 chiahin chak ber nihna an chang tawk a. Chungte chu - 1. Vanlalkulha, Zembawk, 2. F Tlangsiama, Nursery, 3.Chalchungnunga, Lunglei, 4. R Vanlalduata Zemabawk North, 5. Saidingliana Sailo, Darlawn, 6. Dominic Lalremsiama, Chaltlang 7. LR bawlliana Chanmari West Aizawl, 8. F.Lalhmingmawia Kolasib, 9. Lalnunfela, Salem Veng, 10. Lalsangliana, Upper Republic te an ni.
MIZO INCHAI TITLE FIGHT A IN LAN TURTE
1. Palian Title Holder : Lalsangliana
Pa/Nu hming : Lalrinmawia(L)
Khua/ Veng : Upper Republic, Aizawl
Rih zawng : 118 Kg
San zawng : 5.11 Ft
Wrestling a hnuhma lo neih tawh : 2014 atangin Palian title Holder a la ni. (Kum 10 chhung) Wrestling in phochhuah tura a duh dangte : Wrestling avangin Excise & Narcotic Department ah hna tha tak a hmu a ni.
## Palian Challenger : Lalrinchhana Sailo
Pa/Nu hming : Lalrinliana Sailo
Khua/ Veng : N.Vanlaiphai
Rih zawng : 97 Kg
San zawng : 5.11 Ft
Wrestling a hnuhma lo neih tawh : Nil
Wrestling in phochhuah tura a duh dangte : Nil
2. Palaihawl Title Holder : Remruatpuia
Pa hming : Zothansanga
Khua/ Veng : Bethlehem Vengthlang, Saitual
Rih zawng : 79 Kg
San zawng : 5.9 Ft
Wrestling a hnuhma lo neih tawh.
1) Kum 2022 atangin palaihawl title kawltu a la ni.
2) NE Games 2024, Free Style ah gold medal
3) Mizoram aiawh in national championship ah a lo kal thin tawh a ni.
## Palaihawl Challenger : Ngursangzuala
Pa/Nu hming : Biaksanga
Khua/ Veng : PWD Veng, Saitual
Rih zawng : 79 Kg
San zawng : 5.8 Ft
Wrestling a hnuhma lo neih tawh : National : Sub-Junior leh Senior ah Mizoram aiawh in vawi khat ve ve a lo kal tawh.
State : Gold – 8 , Silver – 1 , Bronze – 2 State Games 2019 : Bronze
3. Pate Title Holder : B.Lalawmpuia
Pa hming : Malsawmdawngliana
Khua/ Veng : Saitual Hmarveng
Rih zawng : 58 Kg
San zawng : 5.6 Ft
Wrestling a hnuhma lo neih tawh: National : U-16 – Bronze, NE : Gold 1, State : Gold – 30, Pro Wrestling Pate Title Title Holder
Wrestling in phochhuah tura a duh dangte: Wrestling avangin Khelo India hnuaiah Coach hna a thawk mek a ni.
## Pate Challenger Hming : Lalchhanhima
Pa/Nu hming : Lalbiaktluangi
Khua/ Veng : Saitual, 39AR
Rih zawng : 65 Kg
San zawng : 5.7 Ft
Wrestling a hnuhma lo neih tawh: National: Vawi 14 a lo Participate tawh a ni. Silver – 2, Bronze – 2, State : Gold – 34 , Silver -1
2014-2022 chhung Pate Title holder a ni.
Wrestling in phochhuah tura a duh dangte:
Army a a luh hnuin Wrestling avangin heng chanvo leh chawimawina te hi a dawng-
1. Army Physical Instructor
2. Mountaineering Instructor
3. Gover Silver Medal leh DGAR Commendation Card te a dawng bawk a ni.
4. Nulian Title Holder : Lalhmangaihsangi
Pa/Nu hming : Thankhuma
Khua/ Veng : Dilkhan, Salem Veng Aizawl
Rih zawng : 85 Kg
San zawng : 5.5 Ft
Wrestling a hnuhma lo neih tawh : State : Gold – 4, Silver – 3.
Kum 2022 atangin Nulian Title Holder a ni.
National : U-15 (2018), Cadet ( 2019) , Sub-Junior(2020) , Inter SAI 2018 ah te a lo Participate tawh a ni.
Wrestling in phochhuah tura a duh dangte : Kum 2023 ah Power Lifting leh Zonet tangkawp buatsaih ah Mizoram nu chak ber a thlan a ni.
## Nulian Challenger Hming : Zodinpuii
Pa/Nu hming : PC Vanlalsanga
Khua/ Veng : Ramthar, Lunglei
Rih zawng : 72 Kg
San zawng : 5.5 Ft
Wrestling a hnuhma lo neih tawh : Nil
Wrestling in phochhuah tura a duh dangte : Nil
5. Nulaihawl Title Holder: Elizabeth Rohlupuii
Pa/Nu hming : Laldingliana
Khua/ Veng : Melriat
Rih zawng : 63 Kg
San zawng : 5.3 Ft
Wrestling a hnuhma lo neih tawh.
NATIONAL :
1. Inter SAI 2015 Haryana – Bronze
2. School Games 2019 New Delhi – Bronze
3. Khelo India ( 2020) Guwahati – Silver
North East : NE Games 2024 a neih ah Belt Wrestling-ah Gold medal a la.
State : Gold – 13 , Silver-2 , Bronze-1
Wrestling in phochhuah tura a duh dangte.
Wrestling avangin Locknow a Wrestling Academy ah Training a lo nei tawh a ni.
## Nulaihawl Challenger Hming : Penticost Lawmsangpuii Varte
Pa/Nu hming : Lalrikhumi
Khua/ Veng : Champhai
Rih zawng : 67 Kg
San zawng : 5.2 Ft
Wrestling a hnuhma lo neih tawh.
North East Games, 2024 ah : Gold (Belt Wrestling) State: Silver (2) , Bronze (1)
5. Nute Title Holder : Lalvenhimi
Pa/Nu hming : Lalthuamliana
Khua/ Veng : Bethlehem Veng, Aizawl.
Rih zawng : 52 Kg
San zawng : 5.3 Ft
Wrestling a hnuhma lo neih tawh.
National : Inter SAI – Gold (1)
North East : Silver (1)
State : Gold - 20
## Nute Challenger : Lalnuntluangi
Pa/Nu hming : K.Lalrokunga
Khua/ Veng : Diakkawn, Kolasib
Rih zawng : 51 Kg
San zawng : 5.3 Ft
Wrestling a hnuhma lo neih tawh.
State : 2022 Nute Challenger, Gold – 7
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: