KRAWS CHUAN ṬAWNGṬAI THEIHNA MIN PE

_Ni 40 Chhung Ṭawngṭaina_

-  Rick Warren 

-  Sep 18, 2024

“Ama Fapa ngei pawh zuah lova kan zaa aia petu chuan, thil zawng zawng pawh a thlawnin min pe tel lo vang em ni?” (Rom 8:32)

Pathian chu engtiklai pawha a that avangin, i thatna pawh a dah sang hle a ni.

Hei hi Chanchin lawmawm a ni - Lalin a mite tana a nunna a hlan hi. Thawnthuah chuan mipuite chu lal venhimnaah an thi thin a, lal himna tur chuan engkim tih an huam thin. Thawnthu pakhatah chiah mipuite tana Lal thihna a awm. Chu chu Chanchin Ṭha a ni. 

Kristiannaah chuan thawnthu danglam tak a awm a, khawvela sakhaw dang aiin a danglam a ni. Pathian chuan i sual em avangin hrem i phu a ni a ti che a. Nimahsela chu chu thawnthu tawpna a la ni lo. Beiseina kan hmu Rom 6:23 ah chuan, “Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan chatuana nunna a ni.”   

Chumi awmzia chu, Pathian chu a dik a, mi tuemawin i sual man chu a pek a ngai a ni. Pathian tha leh thianghlim a nih avangin a hmangaih che a, chhandam tur chein ruahmanna a siam a ni. Pathian Fapa, Isua Krista a nih angin khawvelah a lo kal a, i sualna avangin a thi a ni. Chu chu hmangaihna lantirna sang ber a ni - a mipuite tana Lal thihna, Berampuin a beramte tana a thihna chu.  

Mi tumahin i sualna man chu an tuarsak peih lo vang che - Pathian chauh lo chuan. Rom sawrkar avangin Isua kha krawsah a thi lo. Hmangaihna avangin  a thi a. A hmangaih em che avangin i tana thih chu a inhuam, a chhan chu a thatna leh zahngaihna vang a ni.

Krawsa Isua thihna avangin i tawngtai theih phah a ni.

“Ama Fapa ngei pawh zuah lova kan zaa aia petu chuan, thil zawng zawng pawh a thlawnin min pe tel lo vang em ni?” (Rom 8:32)

Isua Krista krawsa thihna avang chuan, i harsatna zawng zawng chu chinfel vek a ni. I nuna thil dang harsatna awm chu a tan chuan thil tê tham tak a ni! Pathian chu a that em avangin i tana thih pawh a huam a nih chuan - i bill leh i hrisel lohna leh inlaichinnaa i harsatna zawng zawngte pawh chinfelsak tur chein a hmangaih loh che i ring em ni? Pathian tan chuan thil lian lutuk a awm lo. Chutiang chiah chuan a hnena thlen tur thil te lua a awm hek lo.

Tawngtainaa Pathian hnena i thlen theih loh thil engmah a awm lo. A hmangaih che avangin thih pawh a huam a, i tawngtainate pawh chhang tur chein a hmangaih che a ni.  

Ngaihtuah zui atan

* A te lutuk emaw a lian lutuk emaw i tih avanga Pathian hnena i thlen loh eng thil nge awm?

* Isuan krawsah i harsatna zawng zawng a chinfelsak tawh che tih i hriatin, i tawngtai dan engtin nge a thlaksak che?

* I chhandamnaah Pathian chu i ring tawh a nih chuan vawiinah hian eng kawngah nge Pathian i rin leh ang? 

*Vawiinah hian Isua i zui ang em?*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu : Sangpuia]*