Central YMA leh College zirtirtute'n Mizo ṭawng zirna hawng

Aizawl | August 16, 2024: Central YMA leh College-a Mizo zirtirtu inzawmkhawm pawl, Mizo Literature and Language Teachers' Academy (MILLTA) te chuan vawiin kha, Manipur atanga Zohnahthlak raltlante tan 'Mizo tawng Inzirtirna' bul an tan.

Mizo Tawng Inzirtirna tur hawnna programme RAY Hall, Falkland-a buatsaih hi Prof Lalnuntluanga, Vice President, CYMA chuan a kaihruai a, CYMA General Secretary, Prof. Malsawmliana chuan report pein inhmelhriattirna hun a hmang a. MILLTA aiawhin Prof. C. Vanlalhruaia chuan thu a sawi a. Central YMA president, Pu Lalhmachhuana chuan he Mizo Tawng Inzirtirna hi a hawng a ni.

Hawnna inkhawmah hian CYMA president, Pu Lalhmachhuana chuan raltlante chu Mizorama zirtirtu thiam rualin Mizo tawng an zirtir tur chu an vanneih thu a sawi a. Mizo tawng chu inbiakpawhna atan mai ni lo, hnam inpumkhatna atan a pawimawh thu a sawi a. Raltlante pawh chhuanlam ho te te siam lova, uluk taka Mizo tawng chu zir turin a chah a ni.

Falkland venga Manipur atanga raltlan te hi chhungkaw 59 niin mihring 250 vel an ni a. Manipur district hrang hrang atanga lo kal niin Mizo tawng thiam an duh thu hi CYMA hnenah an thlen a. CYMA hnuaia Literature Sub-Committee chuan bawhzuiin, MILTA nen thawhhona thuthlung siamin, he Mizo Tawng Inzirtirna programme hi an kalpui ta a ni.

College zirtirtute hian anmahni seso leh inpeknain kar khatah zan hnih, Mizo tawng hi an zirtir thin dawn a ni.