-Rev. Dr. Zaichhawna Hlawndo
.jpg)
‘Ṭhattheihmiahlohna Bawm -Party Politics’ tih thu ka ziak lo chhiar tawh te chuan kan rama Party politics kan kalpui dan dik loh avanga sualna nasa tak lo awm dan chu kan hrethiam tawh turah ka ngai. Amaherawhchu Zofate hian thu leh hla lama kan ril viau rual hian thil bul chhui leh hriat lam hi kan hlamchhiah deuh niin a lang. Sual pawh kan hua, tih rem pawh kan duh, kan thiam ang leh theih ang tawk pawhin kan bei nasa hle. Amaherawhchu sual kan do dan leh tihrem kan tum dan hi a lerah kan thuai a, kan beih nasat ang huin kan hlawhtling thei rih lo. Chuvang chuan sual bul/corruption bul hi kan hriatchian a ngai tak zet a ni.
Zoram Thar Zofate Lairelna a kan unaunu pakhat in Zoram Thar lo pian dan tur mumanga a hmuh thu min hrilh hian ka rilru a hneh khawp mai. Hetiang hi a mumanga a hmuh dan chu a ni - Pa pakhat hian an kawt zawl a thinghnah tla hnawk chu tuktin mai hian a phiat fai ṭhin a. Tuktin phiat mahsela tuktin a hnah chu a rawn tla hnawk zel a. A ning lutuk chuan “a zar hi kan satthla vek teh ang” tiin a zar chu a thlak kawlh ta vek a. Mahse thla leh kum a lo vei chuan a zar chu a lo chawrno leh a, a ngaite bawk chuan an kawtzawl chu hnah ro tla chuan a rawn ti hnawk leh ta. “E heti chuan a diklo, a zar chauh nilovin a kung hi kan kit daih teh
ang” a ti a, a kung chu a kit ta a. A kung kit tawh mahsela a zung aṭang chuan a lo chawrno
leh a, thla tam a vei hmain a kung a lo insiam leh dawn ta mai a. “E heti chuan a diklo, a zung
hi kar phawng vek a ngai a nih hi” tiin a zung chawpin a kar phawng ta vek a. Chuta ṭang
chuan a kawtzawl tihnawktu hnah chu a awm ta lo . “Zoram Thar lo pian dan tur chu party
politics sualna hi a zungah phawi a, paih a ni hunah Zoram Thar chu a lo piang dawn a ni a
ti.”
Kan ram hruaitute, politician te hi ṭhat duhlo kan awm awm love. Rorelna fel leh dik pawh
kalpui kan chak vek ang. Amaherawhchu tuna kan party politics kalpui dan aṭang hi chuan
mi ṭha tak nih hi a theih thlawtlo a ni tih chu a hretute vek kan ni. Party dintute chu ram
veitu, ram leh hnam ṭhatna duhtu kan ni a, mahse kan party kalphung chu a corrupt tlat si –
Hruaitu kan thlan dan leh kan ruat dan aṭangin kan diklo (corrupt) nghal a. Party chhung kua
ah hruaitu nihna inchuhna nasa tak kan siam a, party chhungkua ah lam ṭang siamin indona
tenawm tak a awm thin. Chutiang zelin Blok hruaitu thlanna leh Unit hruaitu thlan thlengin
lalna leh thuneihna inchuhna tenawm tak hmangin party kan kalpui. Chu tak chu party
politics a eirukna (corruption) in zung a kaih dan chu a ni.
Inthlan a lo nih dawn chuan MLA candidate tura inchuhna nasa tak a lo awm a. Sum nei nei
hmelṭha tih chu chiang sa. Mi lar leh thiltithei deuhte chu pary ah mithar pawh nise
thuthleng tha chu an chan turah an dah nghal a. MLA candidate tur chuan tangka ngah tawk
a ngai phawt a, a dawt leh ah chuan tangka ngah thlawptu an tam a ngai. Pawisa khelhna lar
tak Hupthuk khelh ang mai hian Inthlan chu kan kalpui a. Tawka, Zum, Ak leh Tial ah a khawi
ber hi nge tla ṭha ang tih kan zawng a. A tlak ṭhatna turah chuan sum chu kan vawm thur
thur ta mai a. A tla tla vanduai ah tih ang maiin a chhuah velohna rawng ho, Sawrkarna siam
velo party te chu an hawi hil tawp a ni mai. A tlakna ṭhatna pawlte/ party te chuan an sum
sen rah tlan tur niawm hrimin kum 5 chhung chu an thuneihna leh sawrkar sum hmangin an
in leng kual vel ta thin a ni ber mai.
Ka eiru ve dawn lo reng reng ti vek si khan, eiruk dan tur an zawn loh chuan an sum sen
phuhrukna tur budget hranpa a awm silo. Nuai 100 chuang an lo sen tawh kha tuihawk
kawra paih ringawt atan chuan an uive lotheilo. An mahni lo puitute sum pek ringawt tur lah
chu budget ah a tel bawk silo. An party mi leh sa, Block hruaitu, Unit hruaitu leh sum leh
paia lo puitu te mangṭang eiturte an tih lawm a, an eive tur ngaihtuah lo theilo dinhmunah
an ding ta ṭhin a ni. Contractor nilo mahse contract hna an pek a ngai a, supplier nilo mahse
supply tur thil an zawn sak a ngai a. Hnaruak awmah an aia phu zawk awm mahse an mi leh
sate duhsak kha a ngai tlat a ni.
Mipuite hnenah MLA a min thlan tlin chuan chumi khami chu ka tih sak ang che u tiin leiba
an lo in siam ther thur bawk si. Sawkarna an chelh tuk aṭang chuan manṭang eitu tur an
rawn inlar ta sup sup a. MLA ṭhat tum leh fel tum tak tak ho chu Ṭhattheihmiahlohna Bawm
ah chuan an awk ta ṭhin a ni. Chuvang chuan Zofate kan harh a ngai, kan ram leh hnam hi
kan hmangaih a, Lalpa Pathianin rorelna hi chang se kan duh a nih chuan tuna party politics
system hi a zungah kan phawi a, kan phorova, kan hal vek a, Pathian lal ram politics – Politics
thianghlima bul kan tan a ngai a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: