"Kan ramin a mamawh ber chu sum enkawl thiam a ni"

Aizawl | July 26, 2024: Mizoram Pradesh Congress Committee (MPCC) vawiin 26, July, 2024 Zirtawpni khan Congress Bhavan, Aizawlah Friday political session kan hmang a. He huna thusawitu MPCC Adviser John Siamkunga chuan, "Kan ramin a mamawh ber chu sum enkawl thiam a ni", tiin a sawi.

John Siamkunga chuan Kum 2008-ah kan sorkar a, rethei takin bul kan tan a, VIP quota zawng zawng kan surrender a, mi hriat phak bakin kan tuar ve a ni. Kum 2018 kan thlen meuh chuan Mizoram hian sum lama harsatna kan tawh thin chu kan sukiang thei a, Finance Commission pawh an lawm hle a ni. Kan sorkar chu a tla ve leh ta a, party dang an rawn sorkar a, Mizoramin sum lamah harsatna nasa tak kan tawk chho leh ta a ni.

Tunah ZPM an sorkar ve leh a, kum khat em pawh an la sorkar hmain sum tam tak an puk belh a, Mizorama la thleng ngai reng reng lo, kan budget 14412 crore a nih laiin 14034.76 crore ba kan nei thei hi a mak hle a ni.

ZPM hian year of consolidation kan hmang an ti a, hei pawh hi kan hrethiam lo. Sorkarin leiba kan ngah em em laiin a hotu chinin board chairman te, Adviser to CM te, consultant leh adangah nihnate an in thei sem a, inrenchemna an kalpui dan hi thil mak tak a ni.

Airport hralh an tum pawh hi eng nge a chhan kan hrethiam phak lo. RTI atanga a lan danin Airport atang hian kum khatah Rs. 19,66,44,228 kan hlep a, sumdawnna ropui tak a nih laiin engvanga hralh tum nge an nih?

Tuna kan CM zahawm tak, Pu Lalduhoma hian, 'Keini kan sorkar hunah chuan kum 10-15 chhung repair ngai lovin kawng kan siam dawn', a ti a, hei pawh hi kan en dawn a ni, tiin a sawi.

He session inkhawm hi Pu Lalremsanga, Secretary MPCC-in a kaihruai a, Pu S. Lalruattlanga, GS, MPYCC leh Pu Lalhmangaihna Kawlni, GS, MPYCC ten thu an sawi bawk.