MZP Lungleiin zirlai chawimawina hlan

Aizawl | June 13, 2024: Mizo Zirlai Pawl Headquarters: Lunglei chuan vawiin Ni 13 June, 2024 chawhma dar 10:00 a.m khan Mizo Zirlai Ti Tha Chawimawina hun an hmang a. He hunah hian Pi Lalrinpuii Minister H&FW chuan khuallian niin a hman pui a ni.

Khuallian Pi Lalrinpuii chuan tunlai zirlai naupang te vanneih tawh zia sawiin eng kawng pawh taima taka an zawh chuan hlawhtlinna in a hmuah thu leh politics pawh luhchilh se CM thleng thleng thei dinhmunah an din thu a sawi a. Tun kuma MBSE in HSLC leh HSSLC result a tih chhuah taka Chhim lam atanga Top Ten-a lang an awm miahlo chu a rilru nat thu a sawi a, Chhim lam zirlaite tun aia nasa a zirna lama tan la tur leh tih tak meuh a zirna lama rilru pe turin a chah nghal a ni.

Tun hnaiah sorkar school zirtirtu te’n ai kal kan la nasa lutuk te chu pawi a tih thu sawiin, ai kal lak avanga zirlai naupante’n an tuar nasa lutuk te sorkar school zirtirtu kan zirtirna kawnga kan inthlah dah lutuk te chuan sorkar school zirna a tih tlak hniam thu a sawi a. Private school leh kohhran school zirtirtu te hlawh tlem zawk hlawh siin taima taka naupang zirtir a sorkar school aia result tha an nei thin chu an fakawm a tih thu a sawi tel bawk a ni. Central Services ah Mizo te awm mang kan awm tawh loh thu leh nakin lawkah chuan kan sorkar hna pawimawh tak tak te pawh hnam dang in an chelh chhoh zel theih thu sawiin, zirna In neitute pawhin results tha deuh deuh ringawt neih tum lova phai lam school te anga professional courses a in ziak tling tam zirlai neih lamah te tan laka in el zawk a tul tawh thu a sawi a ni.

Ruihhlo in kan zirlai naupangte thleng a min run chhiat nasat zia sawiin, sorkar ang pawha social reforms lama hma an lak nasat zia a sawi tel bawk a. A department hnuaia Drugs License pek chhuah an phal tawhloh thu leh license nei sa 36 pawh rinhlelh thu ah an license te an cancel sak thu a sawi a ni. Zirlai naupang kal khawm te chu ruihhlo laka fihlim tur leh hlawhtlinna tak tak nei thei tura taima taka zir turin a fuih a, tumna a awm chuan eng kawng ah pawh hlawhtlinna a awm thu a sawi ni.

Pu Johan Hmangaihzuala Ralte President MZP Hqrs: Lunglei chuan thu sawiin MBSE in result a tih chhuah taka HSLC leh HSSLC-a hlawhtlinna chang ta te chu MZP Hqrs:Lunglei in a lawmpui thu leh an kal zelna turah duhsakna an hlan nghal bawk tih sawiin, hlawhtlinna chang zo ve ta lo te pawh beidawng mai lova tun aia nasa a hlawhtlinna chang ngei tura bei turin a fuih a ni.

Kan bul hnaiah min chen chilh tu hnam hang hrang te zirna lama an harh thar thu leh Mizo te pawh kan harh vat loh chuan kan ram leh hnam tan a pawi theih thu sawiin. Kan bul hnai lawka cheng Chakma-te zirna ah hma an sawn thu leh zirna lama beiseiawm te chu an mihausa te leh mi thil ti thei deuh te’n an zirna senso te an tum sak mai thin thu sawi chhuakin, Mizo te pawh a hnam ang zawnga zirna lama kan thang harh thuai a ngaih thu a sawi tel bawk a ni.

Sorkar school zirtirtute chu tun aia nasa a zirna kawnga hmalak an ngaih thu sawiin, hlawh tam deuh hlawha mahni zirlai naupangte a hmasawnna engmah lang hmuh tur a awm lo chu pawi a tih thu a sawi a, Chhim lam zirna a kan hnufual lutuk ding chhuak leh tur chuan theihtawp chhuaha tan lak a ngaih thu te sawiin, khuallian Pi Lalrinpuii H&FW Minister chu zirna lama hma kan sawn theih na tur kawnga hmalak pui turin a ngen nghal bawk a ni.

Tun hnaiah mi tam tak in MZP chu mahni kuang lo nawrah te an puh thin chu pawi a ti hle a, ram leh hnam tana MZP in hma a lakna chu zirlaite tan anih thu leh MZP in a kuang lo a nawr ngailoh thu a sawi chhuak a ni.

Pu H. Lalthianghlima President, MZP General Headquarters: Aizawl chuan thu sawiin Mizoram-a zirlai pawl pahnih awm chu pawi a tih thu leh inchhunfin MZP te chuan an duh zia sawiin. Tun hnai maiah inchhunfin hi thleng maithei dinhmun a a dinloh avangin mahni zawn ah theuh zirlaite leh ram leh hnam tana theihtawp chhuah zel phawt angai tih a sawi a.

Lunglei District atanga Top Ten-a tumah an lang lo chu pawi a tih thu sawiin zirlaite leh zirtirtute inenfiah kan ngaih zia te, lehkhabu in ang theuh nei siin District dang kan tluk lo chu mak a tih thu a sawi a ni. Kan thian kawmte leh kan hmelhriat te nakin zelah eizawnna kawngah te kan in elpui tur an ni tih zirlai naupangte chu hrilhin, mi te theih ang chu thei turin ngaihtuahna kan sen angai zia a hrilh a, mi fate theih ang theilo bik nih chu a zahthlak thu a sawi a ni. Zirna lamah zirlai naupangte chu insawrbing tur leh zirlai kan nih chhung chuan tumahin kohhran leh khawtlangah a kul a tai a in hmang turin min phut loh thu a sawi a ni.

Tun dinhmunah Mizoram ah hmeichhia te an fakawm zia leh engkim ah hma an hruai thu sawiin khawtlang inrelbawlna ah leh sorkar hnathawk ah pawh a lu ber dinhmun an luah chho zel te, zirna lama a ber an ni thei zel te leh eizawnna kawnga mipa thawh chi ni a kan ngaih zawng zawng an rawn thawk thei zel chu lawmawm a tih thu a sawi a. Hetih lai hian an hmasawnna kawngah hian Mizo hmeichhia te’n Mizo mipa te min phatsan lo turin a chah a, hnam dang pasal neilo turin Mizo hmeichhia te chu a fuih nghal bawk a ni.

MZP te’n ram leh hnam tana ke an pen na chhan chu MZP lo hi Mizoram tan hma la tu tur an awmlo tih thu sawiin, kan hnam a damloh chuan kan ram a dam dawn lo a ti a ni. Tun hnaiah kan ramah kan unaute hmun hrang hrang atangin an rawn raltlan a, kan unaute nilo mah kan ramah an awm laia reilote chhung chauh kan unau te rawn awm lailawk tur chu hmumawh mai lova kuangkuah a dawh tlat turin kal khawm te chu a chah a ni.

Mizo Zirlai Ti Tha Chawimawina ah hian Lunglei Town Area huam chhunga HSLC-a Distinction-a passed zirlai naupang 53 leh HSSLC-a Distinction-a passed zirlai naupang 26 te bakah 100% passed school 14 te leh HSLC-a Mathematics leh Science subject topper-te chawimawi an ni.