Maldives Open 2024 - 10 Ball Pool Championship-ah Mizo player Lalrina Renthlei

Aizawl | June 24, 2024: Maldives Open 2024 - 10 Ball Pool Championship-ah Mizo player Lalrina Renthlei a inlan dawn.

Tuikhuahthlang pa Lalrina Renthlei chuan Maldives Open 2024 - 10 Ball Pool Championship-ah tel turin a hmun a thleng tawh.

Mizoram Snooker & Billiards Association (MSBA) player Lalrina Renthlei hi MSBA President leh Billiard and Snooker Federation of India Vice President Vanlalnghaka'n a hruai / kalpui a ni.

India ram atangin player panga; National 10 Ball Pool Champion lai Shivam Arora - Maharashtra, National 10 Ball Pool Bronze Medalist Lalrina Renthlei – Mizoram, National 10 Ball Pool Quarterfinalist Kushal C - Karnataka, Chetan Chhapra - Hyderabad leh Laksh Sharma - Karnataka te an tel a ni.

Maldives Open 2024-ah hian khawvel huapa Pool khel thiam tak tak an inlan dawn a. Heng mi thiam tak takte hi Mizo tlangval hian a hmachhawn dawn a ni.

Lalrina Renthlei hian naktuk chhun dar 12 hian World top player zing a mi, World No 1 (2018) leh European Champion lo ni tawh Greece Pachal Alexander Kazakis chu a hmachhawn dawn.

Maldives Pool Billiards Association (MPBA) buatsaih Maldives Open 2024 hi June 25 - 30 chhunga khelh tur a ni a. Maldives Open 2024 hi a theuneu lo hle a, lawmman pawh $ 1,30,000 a ni hem mai. Maldives Open 2023-ah khan Ko Ping Chung (Chinese Taipei) chu a lo champion tawh a ni.

Maldives Open 2024-ah hian World Top players tel an awm nual a, a langsar zualte chu; World No. 1 nilai Fedor Gorst - USA, Maldives Open 2023 Champion Ko Ping Chung - Chinese Taipei, tum thum world Champion lo ni tawh Thorsten Hohmann - Germany te an ni.