June 13 - 14 chhungin Mizoram Sports Conclave buatsaih dawn

Aizawl | June 8, 2024: Sports Minister Lalnghinglova Hmar chuan Vawiin May ni 8, 2024 (Inrinni) tlai dar 2 khan a pisa, MINECO-ah thuthar thehdarhtute kawmin June 13 - 14 chhung hian, Mizoram Sports Conclave (Mizoram for Olympics 2036) chu Baptist Centre, Falkland-a neih a nih tur thu a sawi.

Sports Minister chuan, "Mizoram Sports Conclave hi National level sports intawhkhawmna niin Olympic 2036 hi India in thlen tumin a inbuatsaih mek a, Mizo infiammi tam thei ang berin Olympic medal an awrh theihna tura inbuatsaihna hmasa a ni dawn a ni. " a ti.

Sports Minister leh Sports & Youth Services Department-a official ten Central Sawrkar-ah theihtawp chhuahin hma an la a, Mizoram Sports conclave-Preparing Mizoram for Olympic Games 2036 inbuatsaih nan HRDS hnuaiah Rs 68,80,500 a sanction a ni.

North East State Pathum Assam, Manipur leh Meghalaya Sports Minister te SAI atangin Director General leh hotu dang te, Indian Olympic Association CEO, Ministry of Youth Affairs and Sports-a Secretary leh Services Sports Control Board Secretary te chu Sports Conclave-a tel thei ngei turin beisei an nih bakah Tata Trust, Reliance Foundation Sports, Tata Steel bakah Mizo in Olympian kan neih C. Lalremsanga leh Lalremsiami te an tel dawn bawk a ni.

Sports Conclave-ah hian infiammite hmasawnna ngaihpawimawh ber a ni ang. Kum 8 leh 15 inkar te sports-a an hmasawnna tur ngaihpawimawh a ni bawk ang.

Conclave pual hian Website (https://mizoramsportsconclave.com) siam a ni a, he mi kaltlang hian Conclave-a tel tur te in register theih a ni.