May 26 leh 27-ah thli tleh thut thei!

Aizawl | May 25, 2024: State Mateorological Centre, Govt. of Mizoram in a tih chhuah angin Bay of Bengal chhim chhak lam thlipui in siam mek chuan a hrut theih tur zingah Mizoram tel lo mahse Mizoramah ruah leh thli a rawn thlen tura ngaih a ni a. May ni 26, 2024 leh May ni 27, 2024 ah niin, Mizoram hmun thenkhatah thli na vak lo (50-70 Kmph) vela thawk theia ngaih a ni.

Thlipui tleh tur vang hian mipuite chiai lo turin District hrang hrang bawrhsapte chuan an hriattir a, amaherawhchu, mipuite thlipui leh ruah thleng thut thei laka fimkhur tur leh inven theihna hrang hrangte zawm turin ngenna an siam bawk.

1. Mahni in leh lote thli leh ruah a dawl theih nan a tul anga thawm that ngai laite thawm that tur a ni.

2. Tui paihna leh tui luankawr te mumal taka siam tur a ni.

3. Ruah sur avanga lei min thei laite hriat chiana fimkhur ni se.

4. Tui hmun, lui leh ramhnuaiah te kal loh a tha.

5. Ruah vanga eng (Power supply) neih loh theih a nih avangin electric hmang thil te charge lawk theih a piang charge lawk a tha.

6. Rikrum thila mamawh tur torch light, emergency light, first aid kit, tui thianghlim leh ei tur te lo in rin lawk a tha.

7. Thu dik tawk lo leh belhchian dawl lo thehdarh loh tur a ni a, lo thehdarh an awm chuan DM Act 2005 hnuaia hremna dan ziak angin an chungah action lak a ni ang.

Chhiatna a lo thlenin District Emergency Operation Centre emaw Bialtu Zonal Officers hnenah a rang thei ang bera hriattir turin mipui an hriattir bawk a ni.