IMMANUELA THI ZÂMA'N TIH HLA LO PIAN CHHUAH DÀN LEH TUNLÁI NUN

Written by,

— Centenary C. Lalzahawma

𝐶𝑜𝑙𝑢𝑚𝑛𝑖𝑠𝑡, 𝐸𝑥𝑝𝑙𝑜𝑟𝑒 𝑀𝑖𝑧𝑜𝑟𝑎𝑚 

 

            'Immanuela thi zâma'n' tih hla hi hla ril leh lăr tak mai a ni a, Kristian Hla Bu nambar 173-na a ni. He hla phuahtu William Cowper-a hi kum 1731 khán a lo piang a. Kum 6 mî a nihin a nu-in a boralsan a. A pa-in dàn a zirtír a; mahsé, a lo à ta a. Thla 18 chhúng zet mi a dahnaah an dah a. A rilru a hah ṭhìn hle a. Vawi khat chu intihhlum tumin Thames lui a pan a. 

Mahsé, chhûm a zin phui vek avàngin taxi khalhtu nèn an bo va, a haw leh ta a. Inah chuan Pathianin Rom 3:25, “Pathian dawhtheihnaa hmân lái sualte haiderin a awm avàng khán, Pathianin ama felzia entír nán Krista Isua chu, a thisen a, rinna avànga sual thuphachàwinaah a ruat a,” tih thu hmang chuan a tiharh ta a. Chumi hnu chuan Zakaria 13:1, “Chumi ní-ah chuan sual leh bawlhhlawhna tlen fai nán Davida chhúngte leh Jerusalem luahtute hnénah tuikhur hawnin a awm ang,” tih thu hmangin Pathianin a rawn páwl leh a. A sualzia inhmuin Pathian ngaihdamna a hmuchhuak a :

            “Mi sual thi tùr an khenbeh khân,

            Chhandamna lui a hmu;

            Amah angin sual mah ila,

            Min la ngaidam duh e,”

a'n ti phawt a. Pathian hmangaihna rópùizia a hmuhin,

            “Thisen lui chu ka lo hmuhin,

            Khawngaihnain a khat;

            Chatuan pawhin a kang lo vang,

            Mi sual faina lui chu...”

tìin he hla hi a lo phuah chhuak ta a ni.

            Ni khat chu he hla, 'Thisen lui chu khawngaihnain a khat' tih hla hi London-a mi lianho inkhâwmnaah hian an lo sa a. Hmeichhe awm khawlo tak hi rawn kal vè a tum a. An Pastor chuan a lo hnar a. Chu hmeichhia chuan, “Ka pu, kei ang mi sual tán hian hmun dang a awm vè ang em?” a ti a. Chu Pastor chu a harh chhuak tâ a, “E, unaunu, Gilead-ah damdawi a la awm e. Thisen lui chu khawngaihnain a khat, chatuan pawhin a kang lo vang. Amah pantu daih loh leh pawm duh loh a nei lo,” tìin a au chhuak a. An harh dûn tâ a! Hmangaihtu Pathian hmangaihna thûkzia leh rilzia an hre thiam ta a ni. 

            Kan ngaihtuah ngai em? Tùnlái khawvêlah suahsual rawngbàwlna chi hrang hrang a nasa êm êm a, kum naupang tak tak suala tlu mékte lah hmun tinah an awm bawk. Duh rěng vànga piang tumah kan awm awm lo ang bawk hian, duh rěng vànga sual kawng zawh lui tumah kan awmin a rinawm loh. Khawvêl hun hnuhnung lam kan hnaih tawh êm êm a, sual setana hian a ram zauh nán ṭan nasa takin a là a, tute mai pawh hi Síamtu [Pathian] ṭanpuina leh awmpuina tel lo chuan thlèm thlûk mai pawh kan awlsam ṭhìn rěng a ni. 

            Hêng, kan unau, suala tlu mékte kan dirìam duh dàn hi a lutuk deuh lo maw, kan ti vè ṭhìn em? Mi ṭhenkhat an mualpho a, mahni fel fihlim, sualna nei lo, uire nu déng hlum thei ang maia mi fel leh ṭhàa inngaite'n an mualphòna mi dang hmuh theih tùrin kan han theh darh leh ṭhìn. Hêng mi dangte hmingchhiatna hmun danga lo theh darh chíam ṭhìn mîte hi sualnain a bawh mék, zu hmun sa hmuna khawsa ṭhìn te ni lovin Pathian ngaihsak mî, Pathian Biak bûk timáwitu leh Biak in tuala làm hmahruaitu an ni duh khawp asin. 

            Bible-ah chuan, “Tin, mîin in chunga an tiha in duh tùr ang zêlin mî chungah pawh ti vè rawh u,” (Luka 6:31) tih thu kan hmu. Anni ni lovin keini zâwk hi kan hmingchhiain lo mualpho zâwk ila, kan hmingchhiatna leh kan mualphona hi mi dangte hian khawvêl mîte hmuhah lo theh darh tâ se kan duhin a rinawm bîk loh. Chuvàngin, mi dangte ṭhat lohna, an hmingchhiatna leh an mualphòna lo theh darhsak chíam chíam mai hi a ṭŭl lo hle a, a Kristian nunzia lo hle bawk. Hringnunah hian tihsual palh lian tak kan nei ṭhìn. Kan tih tùr dik tak kan tih loh ái maha pawi zâwk chu kan tih loh tawp tùr kan la ti tam lutuk ṭhìn hi a ni. 

            Pathian áiin kohhran kan ngaihsak a, mi rethei chanhaite áiin Pathian kan hmangaih zâwk a, zu leh sa hmuna khawsaa thawmhnaw hlui tak tak hàa sual kawng zawh mékte hmusit a, felna kawng kan zawhpui Coat Suit nèna Pathian Biak bûk thianghlima kan làwi luhpuite chauh kan hmangaih chuan, kan awm dàn hi Krista Chanchin Ṭhà nèn a inmàwi lo hle a ni tih hi hai rúal a ni lo vang. “Eng pawh ni sela, in awm dàn chu Krista Chanchin Ṭhà nèn inmàwi phawt rawh se,” (Philippi 1:27) tih a nih kha. 

            Mîte, kawng laka an tlûk chuan an ruih vàng ni lovin an kalna kawng a nàl vàng a ni tih pawm thiamin a kài thò hmasatu nih tum ila, sual avànga kan tlûk palh hun a lo thlen vè pawhin hmangaihna nèn min kâi tho vè dáwn a ni. Kan ṭawngkam ṭha, kan ká aṭanga chhuak mah a rah kan seng chuan, kan thil ṭha tih rah phei chu kan seng hmaih hauh lo vang.