I HLUTNA CHU MIDANG RAWNG I BAWLSAKAH HIAN A NI

_Rinna huaisen_

-  Rick Warren 

-  May 8, 2024

“Mi tinin thilpek in hmuh ang zelin Pathian khawngaihna tinreng enkawltu thate angin, chung chuan rawng inbawl tawn theuh rawh u.” (1 Petera 4:10)

Hringnunah hian thiltih kan nei thin a, tangkaina a neih beiseiin kan ti thin. Nimahsela a nihna takah chuan kan hlutna chu mi dangte rawng kan bawlsakna hi a ni. Rawngbawlna awmzia chu mi dangte tana thil tha tih hi a ni.

I hlutna chu i dinhmun emaw, i incheina emaw, i car emaw, i kawr hmaa thil inziak avang khan i nei lo va. Hlawh sang tak i neih avang kha a ni lo va. Hmeichhia emaw mipa i nih avang khan a ni chuang lo.   

I hlutna chu i rawngbawlna aṭang khan a ni a. Mi dangte i ngaihtuahna leh an tana i nun i pekna atang khan i hlutna a lo piang a ni zawk. Mahni hmasial tak i nih chuan hlutna i nei thei lo vang. 

Bible-in 1 Petera 4:10 ah chuan, “Mi tinin thilpek in hmuh ang zelin Pathian khawngaihna tinreng enkawltu thate angin, chung chuan rawng inbawl tawn theuh rawh u,” min ti a ni.

Engte nge i talent? Pathianin a pek che theihna leh thiamna danglam bik eng nge i neih? Nangma hamthatna tura Pathianin a pek che a ni lo. I kiang vela awmten an hlawkpuina turin Pathianin a pe che a ni. Hlutna nei turin Pathianin a siam che a, i theihna leh thiamna chu mi dangte rawngbawlsakna tur a ni.  

Thuhriltu 4:9-12 chuan, “Pahnih chu pakhat ai chuan an tha zawk, an thawh chhuah that avangin. An tluk pawhin pakhat chuan a thian chu a khaiding dawn si a; mahni chauhva awm kha erawh chu a chung a pik e, a tluk chuan khaidingtu tur a nei si lo. Chu lo pawh, pahnih chu an mut dun chuan an inngheng lum thei a, pakhat erawh chu amah maiin engtin nge a lum theih ang? Tin, amah maia awm kha chu miin hneh thei mahsela, pahnih chuan an lo dodal zo dawn a ni, hrui thum hrual chu a chat lawk ngai lo ve,” a ti.

Nangmah maia thiltih chu a awlsam zawk i ti a ni maithei e. A huhova Pathian rawngbawl tura duan i ni. Chhungkuaah te, pawlho leh kohhranah rawngbawl tura duan i ni. Inlaichinnaah pawh rawngbawl tura duan i ni.

Hlutna nei turin i theihna sangber Pathian pek i duh em? A nih chuan in khawtlangah Pathian rawngbawl rawh.

 

Ngaihtuah zui atan

* Duan i nihna chu i thilpek, theihna, mimal nun, leh tawnhriat hian a siam a. Pathianin a duan chhan che chu engvangin nge i hriatthiam a pawimawh?

* Engtizawngin nge Pathian rawngbawl nan i theihna leh thiamna chu i hman ang? 

*  Khawvel ngaihdan hlutna leh Pathian ngaihdan hlutna chu engtin nge a danglam? 

*Khawiah nge i chatuan hmun i hman dawn?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. 

Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*