Champhai April 22, 2024: Zokhawthar YMA President in Doordarshan palai zawhna a chhan danin, Myanmar nena insumdawn tawnnaah hian Zokhawthara cheng tam berte an innghat a. Sumdawng piah lamah bungraw lut leh chhuak thiar hna chu an innghahna ber a ni a, lonei turin Zokhawtharin ram an neih loh avangin ramri khar tumna chuan an eizawnna a nghawng hle dawn a. He hmalakna hi an thlawp loh thu leh, bialtu MLA hnenah hmalakpui tura ngenna an thlen tawh thu a sawi.
Zokhawthar leh Myanmar lam Khawmawi te chu khaw khat ang maia cheng, an mamawh leh chakkhai pawh inban tawn a, chhiat ni that ni-a inlenpawh tawn thin an ni a. Inkalpawh thei lo tura ramri khar hian nitin khawsak phungah a nghawng tur thu a sawi tel bawk.
Tun dinhmunah Indo- Myanmar border hi zirlaite leh hriselna lama mamawh neite tan hawn lailawk a ni a. Bungrua pawh nitin mamawh, essential commodities phur chauh kaltlang tir phal a ni.
DD Mizoram-in a tarlan danin, Zokhawthar hi tun dinhmunah Mizorama raltlan tamna berte zinga mi a ni a. A buaipuitute chhinchhiah danin mi 7000 vel an cheng a. Raltlante tanpuina a luh mumal tawh loh avangin raltlante hi nitina inhlawhfa leh dawrkaiin an eichawp an dap a. Ramri khar hian raltlante thlenga a nghawng theih tur thu Zokhawthar YMA President chuan a sawi.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: