NAAC-in Hrangbana College endik

Aizawl | April 4, 2024: Govt. Hrangbana College chuan nimin leh vawiin khan India rama college leh University hrang hrangte en diktu National Assessment and Accreditation Council (NAAC) assessment an hmachhawn a. India ram hmun hrang hrang aṭang lo kal Peer Team Professor rual-ten college hi an en dik a ni.

A ni khatna, nimin April ni 3 khan nilengin college en dikna hun hi an hmang tawh a. Tlai lama Alumni leh zirlai nu leh pate nena inkawm hona hun an hman chu Hrangbana College Alumni Dr. Vanlalthlana, Pu Lalbiakzama, Pu B. Lalchhanzova, Lt. Col. Clement Lalhmingthanga bakah Hrangbana College Principal hmasa ber Dr. Kenneth Chawngliana leh Alumni hruaituten an hmanpui a, zan lamah college Golden Hall-ah Cultural Night ropui taka hman a ni bawk.

Peer Team member te hian Hrangbana College zirlai naupangte talent neih ṭhatzia bakah, zirlai leh zirtirtute inkara inlaichinna leh inpawhna ṭhatzia an sawi a, zirlai naupangte’n an kutchhuak chi hrang hrang en dik tura an lo pho chhuah chu hmuhnawm an tihzia leh ropui an tihzia thu an sawi bawk.

Vawiin lamah Durtlang leh Muthi-a mipa leh hmeichhe hostel bakah college hmunhma te en dik lehin tlai lama Exit Meeting an hmang a, endikna hun tluang takin an zo.

Tun ṭum hi, Mizoram sawrkar enkawl college zinga NAAC ‘A’ grade nei hmasa ber Hrangbana College-in NAAC Assessment vawi li an hmachhawnna a ni tawh a, kum 2018 khan a vawi thumna hmachhawnin B++ grade pek an lo ni tawh bawk.