Aizawl | April 2024: Mizo film, 'Mo Sual' leakout chungchangah vawiin khan director Melody G Fanai chuan Cyber Crime PS hotute a hmu a. Film lo thehdarhtu nia hriat erawh a inlan lo.
Melody G Fanai chuan, "In ngaihdam hi kan uar lutuk a, hei hian a ni lo zawngin min kaihhruaina chen a awm in ka hria." a ti a. Ngaihdam mai mai a tum loh thu a sawi bawk.
Film thehdarhtu nia hriat hi vawiin khan koh ni mahse, mimal buaina avangin naktuk lamah inlan turin a insawi niin thu dawn a ni.
Melody G Fanai chuan, dan anga hma lak zel a tum thu a sawi a, zuzi mai mai emaw, inngaihdam lam a rilru ah a lan loh thu a sawi.
"A tawp ka thleng dawn a, chumi a tan chuan lawyer te leh thianthate nen hma kan la ho mek a, hei hian film siamtu leh a entu mipuite leh film changtute inkarah inzahtawnna tha tak a hrinchhuah chuan chu chu ka lawmman ah ka ngai. In ngaihdam hi kan uar lutuk a, hei hian a ni lo zawngin min kaihhruaina chen a awm in ka hria. Kan hmalakna kal zel pawh ka la rawn sawi zel ang." a ti bawk.
A film darh chungchangah Mo Sual Director chuan hnuaia mi ang hian thuchhuah a siam.
KA FILM SIAM MOSUAL LEAKOUT HI:
Mizo ten lemchan khawvelah nasa takin hma kan sawn a, hei hi hun rei lo te, kum 5 kal ta vel chauh kha ala ni. Lemchan khawvela kan hmasawnna hi a thlawh in a thlawk dawrh dawrh a ni ber mai.
Film siam lama tui tak tak kan awm chho zel a, achangtu te zingah pawh talented tak tak, film an chan atanga entertainment khawvel a eizawnna hmu chho te pawh an awm ta mek zel a, hei hian kan thalaite hmakhua pawh nasa takin a su kaw chho zel dawn in alang a, beiseina pawh a sang chho hle.
Chutianga hmalam hun beiseina nen a kan thlir mek laia keimah anga film siam thin thenkhatte sum tamtak leh ngaihtuahna, tha leh hun senga an film siam thenkhat a lo LEAK OUT leh thin hian min ti thinrimin min ti beidawng lek lek thin a, a chang chuan a chhe theihtawp an duh anih hi ti a thapui thawh a, lemchan khawvela ka thawhpuite nen intiam ruala hmalak hi ka duh fo thin.
Mi te angin sulhnu tha tak hnutchhiah nei ve lemlo mah ila, cassette reel hunlai atanga lemchan lo buaipui ve tawh thin leh lo vahvaihpui tawh thintu ka ni ve a, tun hnu a rawn tuithar thut pawh ni lovin theihtawp kan lo chhuah ve tawh thin. Tun dinhmunah pawh hian zan mut hun mumal lo te, thil pawh ei mumal hman lo leh khawl thil vil reng ngai karah kan film chan mek atan a ngaihtuahna sen nen, a chang chuan damlo a tluk hlawl chang te pawh ka nei fo thin. Chutiang taka thawkrim leh rilru leh ngaihtuahna senga kan siam *MOSUAL* film heti maia a leakout hi chu ka ngaih thiam zawng ani ve lo.
Ka thiante tawh ang ka tawk ve anih hi ka tih rualin kei ni film siamtute hmakhua atan leh awareness atan pawh kei chuan a tawp thlengin he thil hi ka hmachhawn dawn ani. A ti leakout tu kan hre tawh a, FIR kan thehlut tawh a, kan police ten engkim min buaipui zui sak tawh ang.
He a thil tih hi rukruk nen danglamna a awm lova, chuvang chuan a phu tawk hremna hmuh tir turin theihtawpin ka bei zel dawn ani. Ka thiante pawhin hetiang hi an lo tawk zauh zauh tawh thin. Tun hnaiah Mizo hmeichhe zingah chuan Film Maker/Director/producer awm te zingah a active awmchhun ka ni a, he issue ah hian thuhnu ka dawn vak dawnlo. A ti leakout tu te an lo man fo tawh thin a, sum an chawi thin tih pawh an hresa vek mai chauh nilovin, kan film ah ngei pawh WARNING inpe lawk in ka tar thlap a, chutiang pawh min zahsak lo a, ka mizopui ngeiin hetianga min ruksak leh min thehdarhsak duh hi ka la na leh zual. A tawp ka thleng dawn a, chumi a tan chuan lawyer te leh thianthate nen hma kan la ho mek a, hei hian film siamtu leh a entu mipuite leh film changtute inkarah inzahtawnna thatak a hrinchhuah chuan chu chu ka lawmman ah ka ngai. In ngaihdam hi kan uar lutuk a, hei hian anilo zawngin min kaihhruaina chen a awm in ka hria. Kan hmalakna kal zel pawh ka la rawn sawi zel ang.
Melody G Fanai
Director
Mo Sual Movie
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: