Min thlan tlin chuan MZU Southern Campus hi kum khat chhungin a function nghal ang!

Aizawl | April 5, 2024: Vawiin dt. 5th April, 2024 hian Pu Vanlalhmuaka BJP Mizoram State President, BJP MP Official Candidate chuan Lunglei BJP Office ah Party hrang hrang aṭangin mi 17 BJP ah lawmlutin, Member thar lawmluh an nih hnu hian BJP State President Pu Vanlalhmuaka leh Dr. K.Beichhua MLA te chuan BJP Lunglei Office ah Press Conference an nei nghal bawk a ni.

Press Conference ah hian Dr. K. Beichhua MLA chuan, "Mizoram Kristian te hi inenfiah chu kan ngai in a lang a, BJP pawh hlau, Hindu pawh hlau, heng ho hlauh ngah lutuk Kristiante hnena Chanchinṭha hrilh hi kan tih tur a ni," a ti.

Pu Vanlalhmuaka State President leh BJP MP Official Candidate ni bawk chuan Lunglei Press mite kawmin, "Lunglei Khawpui hian MP-a min thlang tling a nih chuan vawiin thlenga la function lo, Lunglei ah MZU Southern Campus hi kum khat chhungin a fuction nghal ang a ti a. Tin, Lunglei khawpui hi 'Mizoram-a khawpui mawi ber' a ni ang," a ti bawk.

Pu Vanlalhmuaka chuan, "Centralah hian BJP-in Sorkarna a siam leh ngei dawn a. 'Lei hi beng ila, kan ben ṭhelh lo ang' chutiang chiang chuan BJP hian Central-ah Sorkarna kan siam ngei dawn a ni tih a chiang a ni," a ti bawk.

Pu Vanlalhmuaka BJP MP Official Candidate chuan, "Mizoram Mipui hian MP atan min thlang tling a nih chuan, Central Minister ka ni ngei dawn a, Mizoram mipuite hian Central Minister atan Mizo Kristian pa ngei neih kan duh a, State dang te awt lova Mizoramin Development a taka kan hmuh theih nan min vote ṭheuh turin ka ngen che u a ni. Tin, he Union Minister nih theihna dinhmuna ka din theih chhan hi Delhi-a kan hotute'n a min duhsak vang a ni," a ti a.

Pu Hmuaka chuan sawi chhunzawmin, "BJP Mizoram hruaitute hi Kristian kan ni a, Hindu ho Pathian hmaah hian tumah Mizoram aṭang hian kan la inthawi ve ngailo. Sakhuana chungchanga BJP theihpatawpa min beitu Congress Party Chief Minister te erawh kha chu Milem Pathian hma ah an inthawi tih khawvel hmuh ah tarlan a nih kha. Chuvangin Hindu hlautu te'n an tihdan an entawn a, keini Hindu Party an tih te erawh chuan an Serh leh Sang kan khawih pui ngailo thung tih Mizoram mipuite'n min hriat sak turin kan ngen che u a ni. Chuvangin Mizoram leh Hnam leh kan Sakhua a himna tur pawhin keini BJP Mizoram Kristiante hi kan pawimawh ber dawn a, Mizoram mipuite tun hun ṭha hi bawlh pelh lova, BJP MP ngei Mizoram hmasawn nana min thlang turin ka sawm vek che u a ni," a ti bawk.