Khawzawl District-a thli leh ruah vanga chhiatna tawk te tanpuina pe chhuak

Khawzawl | April 4, 2024: March ni 31 leh April ni 1-a thli leh ruah thawk khan Khawzawl District chhungah chenna in, Biak in, ran in leh bungraw dang engemawzat a tichhia a. Hriat theih chinah thli leh ruah avanga chhiatna thleng 148 zet a awm a ni. Chhiatna a thlen vel leh hian Bawrhsap Pu K. Lalrohlua hovin chhiat tawk te chhawmdawl dan tur ruahmanna siam nghal a ni a, vawiin atang khan vanduaina tawk te hnenah tanpuina pek chhuah tan a ni.

Tanpuina sem chhuah dan tur hi Bawrhsap Pu K.Lalrohlua hovin Bawrhsap Pisa-a Officer te leh Disaster Management & Rehabilitation (DM&R) Zonal Officer ten vawiin khan an rel a. Vanduaina tawk chhungkua te hnenah State Disaster Response Fund (SDRF) inkaihhruaina danin a sawi angin tanpuina hi pek chhuah nghal a ni. Khawzawl DC Office-in tanpuina tur pawisa a neih bak hi Mizoram sawrkar chuan DM&R Department kaltlangin a rawn pek belh dawn tih he hunah hian tarlan a ni a, Khawzawl Bawrhsap Pu K. Lalrohlua chuan District mipui zawng zawng aiawhin Mizoram sawrkar hnenah lawmthu a sawi.

Bawrhsap Pu K. Lalrohlua chuan District chhung khaw hrang hranga chhiatna tawk te tan tanpuina pek chhuah nghal char char a ni tawh tih sawiin Bank Account leh Aadhar Card number thehlut tawh te hnenah pek chhuah hmasak a ni tih a tarlang a. Tanpuina la dawng lo te pawh an Aadhar Card leh Bank Account number an thehluh fel hunah tanpuina an pek nghal vat tur thu a sawi bawk a ni.

Tanpuina sumfai pek chhuah bakah hian Zonal Officer ten an bial chhung theuha chhiatna tawk te pualin Silpauline an lo sem chhuak tawh a. Khawzawl Bawrhsap chuan thli leh ruahin in chung a tih chhiat sak te rangva mamawh dan la khawmin, sawrkarin a hriattir angin rangva mamawh dan hi sawrkar hnenah thlen a ni tawh tih a tarlang a, rei lo teah rangva te hi sem chhuah theih beisei a ni.