HLAU CHUNG PAWHIN RINNAIN KE PEN RAWH

_I Nun Thiltum Puanchhuahna_

-  Rick Warren 

-  April 17, 2024

“Lalpa an mi vauziate hi ngai teh; i bawite hi huai takin i thu hriltir la.” (Tirhkohte 4:29)

Tu te pawh hian hlauh kan nei. Chu hlauhna chuan nunah thu a nei fo thin a; Pathianin ti tura min duh pawh hi kan tih theih loh phah fo thin.

Daniala sakeibaknei puka a awm ang mai khan, Krista kan rinna  sawi nghing lawih lawih thei thil a awm fo thin. Nimahsela duhthlanna kan nei: Hlauhna chu hnehin, hlau chung pawhin Pathian tan kan ding tur a ni.

A chhan chu hlauhna hi kalsan mai a har thin. Hlauhnaa i inbarh luh chuan, i rilru a hrehawm tulh tulh ang. 

Pathianin ti tura a tih che i tih loh chuan hlauh i ngah tulh tulh ang. Chutiang zelin, hrehawm i ti tulh tulh ang.

A nih chuan engtin nge i tih ang?

Kristian hmasate awmdan kha zir rawh. Kristian hmasate hlauhna hmachhawn ang kha hmachhawn tur chu kan ni chuang lo. Ringtu hmasate kha chuan tihduhdahna tinreng an tuar a ni. Tirhkohte thiltih bu hian hlauhna laka an dinchhuah dan tlem azawng a tarlang a. Petera leh Johanan huai takin Isua chanchin an tlangaupui a, dodaltu pawh an lo chhuak nghal a ni.    

Tichuan an tawngtai a, “Lalpa an mi vauziate hi ngai teh; i bawite hi huai takin i thu hriltir la.” (Tirhkohte 4:29)

 

Hlauhna hneh dan chu hlauhna ngaihtuah ngawr ngawr a ni lo va. Huai tak chunga hma lam pan hi a ni. Hlauhna hmachhawn la. Hlauhna chu ngaihtuah vak vak hi a ni ber lo. Hlauhna kalsan dan tha ber chu hlauhna hmachhawn chunga Pathiana innghah hi a ni. 

Hei hi theihnghilh ngai suh: I hmaa tui awm chu ke i pen hma loh chuan Pathianin a then hrang lo vang (Elija leh Elisa chungchang tarlanna 2 Lalte 2:8 en la). Rinnaa ke i pen chuan, Pathianin kawng a kawhhmuh ang che. Nimahsela hlauhna chu i pai reng chuan a bo lo vang.   

Vawiinah hian rinnain ke pen la, Pathianin hlauhna i hneh theih dan tur kawng a kawhhmuh ang che.  

Ngaihtuah zui atan

* Hlauhnaa i rilru i pek viau lai khan engtin nge hlauhna chu i neih belchhah zawk? 

* Pathian tana huai taka i inpek khan engtin nge hlauhna chu a bo theih? 

* I nitin nunah eng hlauhna nge kalsan harsa i tih ber? Engvang nge? Chung hlauhnate chu Pathian hnenah engtin nge i thlen theih ang?

*Vawiinah hian Isua i zui ang em?*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*