THIL ṬHA TIH BANSAN SUH

_Pathian Nena Thawhdun_

Rick Warren

Mar 19, 2024

“Thil ṭha tih i ning suh ang u, kan inthlahdah loh zawngin a hun takah kan la seng ngei dâwn e.” [Galatia 6:9]

I ngaihtuah dan anga thil a thleng lo a nih pawhin, i bansan tur a ni lo. I beih hram hram a, chhel taka i tuar a ngai a ni.  

Bible chuan hetiang hian a sawi, “Thil ṭha tih i ning suh ang u, kan inthlahdah loh zawngin a hun takah kan la seng ngei dâwn e,” tiin [Galatia 6:9]. 

Bansan mai duh eng thil nge i neih? I kawppui chungchangah; kal ngaihna reng hre loin i awm em ni. I eizawnna chungchangah danglamna thlen turin vawi tam i bei a, nimahsela a thleng thei chuang si lo. I thil tum emaw duhthusam emaw nangmah ngei pawh kha tawp duhna thinlung i pu em ni. 

Hei hi thil pawimawh tak a ni. Kum sang tam tak liam tawh atang khan, Pathianin vawiinah hei hi i chhiar  a ring a, Pathian chuan thian angin a bia che a: Bansan suh a ti che a ni.

Puk chu thim hle mahse a tawpah chhuahna tur êng a awm thin a ni. Chutiang chiah chuan eng chu i bul lawkah khan a awm maithei a ni! Pathian mi hriat leh hmangaih i ni a - Pathianin danglam taka a siamna che tipuitling turin damchhan i nei a ni.

I thiltihte chu engmah a ni lo ti suh. Thil tha i tih chu bansan suh. I tel loin thil tha zawk a chhuak ang tih ring suh. Chungte chu sual bawlhhlawh kâ atanga lo chhuak mai mai a ni. Pathianin eng nge a sawi hre reng rawh. Pathianin malsawm che a duh a ni.  

Tawpsan suh. Pathian en la. Thlarau mi chhungkua zawng la - kohhran leh pawl - harsatna i hmachhawn hun pawha nangmah pui thei tur che zawng rawh.

Thil dang zawng aiin, Pathian tawpsan suh. Nangmahah pawh a beidawng si lo!

Ngaihtuah zui atan.

* Vawiin hian eng thil nge bansan i duh? Engvangin nge tawp tawh hial anga a lan? 

* Thlarau mi chhungkua - kohhran hoten engtin nge i harsat laiin an puih che? Mi dang hnena fuihna leh tanpuina engtin nge tunhmain i lo pek thin?

 

* Pathianin kal zel tura a duhna che eng thilah nge bansan i tum? Vawiina kan zirah khan eng fuihna kha nge hriatreng tur awm?

*[Lettu: Sangpuia]*