Regular lova Nurse zir dan phal loh

Aizawl | March 6, 2024: Mizoram Nursing Council (MNC) chuan vawiin khan thuchhuah siamin, Regular lova Nurse zir chu dan phal loh a nih thu sawiin, "Mizoram Nursing Council hnuaiah in register theih a ni lo," an ti bawk.

MNC chuan, "Mizo thalai, state danga nursing zir (abikin Post Basic B.Sc. Nursing leh M.Sc. Nursing course) te zingah regular lova distance education (i.e. correspondence or in non-attending mode) a zir lui kan la awm tih hriat a ni a. Hei hi INC Guidelines kalh tlat a nih avangin Mizoram Nursing Council chuan a ngaimawh hie a. State dang atanga Nursing Course zir chhuak MNC a in register tur emaw, additional qualification certificate dil te pawh fimkhur takin screening neih thin tawh a ni." an ti a.

"Regular lova zir te hi danin a phal loh avangin Mizoram Nursing Council hnuaiah in register theih a ni lo tih kan in hriattir nawn leh e." tiin thalai Nurse zir turte a hriattir.

Mizo thalai tam takin nursing zirna hi an bawhin Mizoram chhung mai ni lovin State dangah te pawh thahnem takin an zirin, zirchhuak tawh pawh mi tam tak an awm tawh.

India ram chhungah hian Nursing zirna hi Indian Nursing Council (INC) hnuaia awm niin, syllabus leh regulation pawh uluk taka duan a ni. Hei hi India ram chhunga Nursing institution zawng zawng te zawm vek tura tih an ni a. INC hnuaia Nursing zirnaah hian regular/formal (theory & practical) a zir vek tur a ni. Post Basic B.Sc. Nursing course bik hi INC approved IGNOU Study Centre hnuaiah a zir theih hawk a ni.