Mizoram AAP-in Delhi CM man an dem

Aizawl | March 25, 2024: Mizoram AAP chuan vawiin khan thuchhuah siamin, "Arvind Kejriwal-a hi Chief Minister nilai, man hmasak ber a ni a, kum 2 chhung ED-in chhui mahse chhan mumal awm lovin an man a ni. BJP hian an tana hnawktura an rin dah bozel an tum ni berin a lang a, chuvangin chu mi kawnga an tana hnawksak ber ni a an hriat Arvind Kejriwal-a, tlawm leh zah pawh dawn lova an bei hi keini Mizoram AAP chuan na takin kan dem a ni." an ti.

Mizoram AAP thuchhuah kimchang

Kan hriat ṭheuh angin AAP National Convener leh Delhi Chief Minister ni bawk, Arvind Kejriwal chu Enforcement Directorate (ED) chuan March 21, Ningani zan khan an man a, man a nih chhan hi BJP-in dawta an puh avangin, PMLA Act hnuaiah man a ni.

Delhi Excise Policy chungchanga thamna laa puh niin, amah Kejriwal-a chuan he policy-ah hian amah leh an party hotute chauh target an ni chu mak a tih thu sawiin, Lt. Governor leh official dangte pawhin an hming an sign ve vek tih sawiin, mi dang chunga case engmah siam si lo va, amah leh an party hruaitute chauh case siam sak an ni chu a dik lo tih sawiin; thamna engmah AAP hian a la lo niin a sawi.

Kejriwal-a Lawyer chuan he case chungchanga vawi 200 chuang Kejriwal-a in an dap hnuah pawh an puhna ah hian proof engmah an hmuh loh thu a sawi. Lok Sabha inthlan a hnaih tawh avangin hetiang hian BJP sawrkar hi a che niin mi tam tak chuan an ngai a, Shashi Tharoor chuan, "He thil hi pawm theih a ni lo va, Supreme Court hi Suo Moto hmanga inrawlh turin ka ngen a ni," a ti hial.

Indian Democracy thuthlung chu a chhungrilah BJP Sawrkarin beiin an thuneihna hmang sualin kawng dik lova hruai a tum mek a ni. Chuvangin, BJP hi an hlauhawm takzet a, Mizoramah BJP ṭan

tawk leh BJP zawmpui NDA zawm an la awmzel hi thil mak a ni zawk a ni.

Arvind Kejriwal-a hi Chief Minister nilai, man hmasak ber a ni a, kum 2 chhung ED-in chhui mahse chhan mumal awm lovin an man a ni. BJP hian an tana hnawktura an rin dah bozel an tum ni berin a lang a, chuvangin chu mi kawnga an tana hnawksak ber ni a an hriat Arvind Kejriwal-a, tlawm leh zah pawh dawn lova an bei hi keini Mizoram AAP chuan na takin kan dem a ni.

India rama Indian Constitution hnuaia sakhua leh mimal zalenna hi thiam takin BJP te hian nuai bo hret hret an tum a, he an hmalak meknaah hian Mizoram mipuite pawh thudik hria a, theihtawp chhuaha BJP Sawrkar do turin kan sawm a ni. AAP Convener leh Delhi Chief Minister Arvind Kejriwal bakah hruaitu dangte hi BJP sawrkarin dik lo taka a hrenbehna aṭang hian chhuah zalen thuai turin kan phut bawk a ni.