HMACHHAWP LIAN THAMA PATHIAN RINDAN

_Pathian Nena Thawhdun_

-  Rick Warren 

-  March 20, 2024

“Josefa chuan mumang a nei a, a ute hnenah chuan a hrilh a: tichuan ani chu an haw lehzual ta a… Tin, a pa chu a hrilh a, a uteho pawh; tichuan a pa chuan a zilh a, a hnenah, ‘Mumang i neih hi eng mumang nge maw ni?’” (Genesis 37:5, 10)

Hnathawhna lamah hmasawn zel i duh chuan, huai taka i awm a ngai. A chang chuan Pathian ruahmanna anga i awm dawn chuan i nunah huai taka i chet a ngai ang! Huaisenna chu thil lian tham ngaihtuahna te, ngaihdan thar bul tanna te, hlawhchhamna tur remchang a awm lai pawha risk lakna te pawh hi a ni.

Genesis 37 ah, Josefa chanchin kan chhiar a, mumang ropui tak a nei - huai taka paltlangin - khawvela tuma awih loh tur chu a hlen chhuak a ni. A mumangah chuan hruaitu ropui tak a la ni ang a, a unaute pawhin chibai bukin a hmaah an la kun dawn a ni.

Chu chu thudik a ni em? Pathian hnena mi mumang a ni em? Ni e. Tihhlawhtlinin a awm tlat a ni. Josefa khan a unaute a mumang a hrilh kha a mak em? Ni e, a mak a ni. 

Josefan a chhungte chu huai takin a mumang a hrilh a, “tichuan ani chu an haw lehzual ta a… Tin, a pa chu a hrilh a, a uteho pawh; tichuan a pa chuan a zilh a, a hnenah, ‘Mumang i neih hi eng mumang nge maw ni?’” (Genesis 37:5, 10).

Josefa ang hian, rinna rahbi chu i rah a ngai a ni - awmzia a neih loh pawhin, miten an nuihzat che pawhin, i hlauhthawn pawhin, miten an dodal che pawhin. Pathianin nangmahah chu a duhthusam chu a dah tawh chuan, rinnaa ke i pen phawt chuan a chawimawi zel ang che.

_Purpose Driven Church_ lehkhabu ka ziah khan, a chhuahtu lam chuan a dik lo vek a, kan hralh lo vang an ti a ni. Tuman bung 40 lai chu an chhiar peih lo vang, chanchin a nei tlem si, Bible thu deuh vek alawm min tihsak a ni. Kei chuan heti zawng hian Pathianin min hriattir a, in chhuah loh pawhin a pawi lo ka ti ve ta hmiah mai a ni.

Ka ṭan ve tlat avangin, ka lehkhabu chu an chhuah tur thu an lo sawi a. A  lawm lawmah chuan an ṭang zawk ta ve ang. Pathianin a hrilh che nia i hria a nih chuan a chang chuan huai taka i awm a tul a ni.

Josefa chuan rinna kawngah huai takin thutlukna a siam zel a ni. A rahchhuah chu a nunah kaisanna zel a ni a -  Aigupta hruaitu ropui tak leh roreltu a ni chho ta der a ni.

Khawiah nge huaisenna chu i mamawh? Khawiah nge Pathian rinna chu i mamawh? Rinna ke i pen a ngai a, ngaihtuahna zau zawk nei la, risk laa ke i pen pawh a tul a ni. Pathian duhthusam chu i zawm a nih chuan, rinnaa ke i pen phawt chuan a chawimawi zel che tih i hria ang.

Ngaihtuah zui atan

* I eizawnnaah huai taka i chet chuan engtin nge  i awm ang?

* Huai taka i chet chuan rawva takin i che dawn tihna em ni? Engvang nge? Eng nge a chhan?

* Pathianin engtiangin nge hmang che sela i duh? I nunah engtin nge tihhlawhtlin i duh? Chu chu tihlawhtling turin engtin nge huaisenna i neih ang?

*[Lettu: Sangpuia]*