Central YMA-in Myanmar raltlan pawl hrang hrangte kawm

Aizawl | March 23, 2024: Vawiin ni 23.3.2024 (Inrinni) chawhnu dar 1:00 khan Central YMA Committee Room-ah Central YMA leh Myanmar ram chhunga Zohnahthlak pawl hrang hrang, Mizorama raltlana awm mek te nen Ruihhlo leh Mizorama Raltlan awm te chungchangah inkawm hona an nei a. He hun hi Pu Lalhmachhuana, President, Central YMA chuan a kaihruai a.

Inkhawmhonaah hian Mizorama Ruihhlo (No. 4) tam lutuk chungchang leh a tih rem dan tur sawiho a ni a. Myanmar lama Chin unau pawl hrang hrangte nen Mizorama Ruihhlo lo lut thin chu a reh theihna tura theihtawpa tanho nise. Pawl hrang hrang zingah ruihhlo a inhnamhnawih an awm chuan tihtawp ni bawk se an ti. Chin Hills a pawl thenkhatte nen ruihhlo chungchang hi la sawiho leh an tum bawk.

Inkawmhonaah hian Mizorama Myanmar Raltlan awmte chungchang sawiho a ni bawk a. Ram leh khawtlang dan tha taka zawm tur leh harsatna siam lo zawnga awm turin an inchah a. Hemi chungchangah hian thuchhuah siam nise an ti.

Inkawmhonaah hian Myanmar lama Zohnahthlak unau pawl hrang hrangte inpumkhatna chungchang sawiho a ni bawk a, inremna leh inpumkhatna a awm zel theihna tura theihtawp chhuah turin Central YMA hruaitute chuan ngen a ni.

Inkawmhonaah hian Myanmar raltlan pawl hrang hrang aiawh mi 42 leh CYMA hruaitu mi 30 vel an tel.