Aizawl | March 25, 2024: BJP Mizoram chuan vawiin 25th March, 2024 (Thawhṭanni) chhun Dar 12:00 khan Lok Sabha MP Inthlanpui lo awm tur atan BJP Mizoram Official Candidate puanna leh Pathian hnena inhlanna hun BJP Mizoram State Office, Mipui Run, Upper Republic ah neiin, Pu Vanupa Zathang, IPS (Retd), State Vice President-in inkhawm a kaihruaia, Rev JH Zahluna'n, Hunserh hmangin Pu Lalramtiama, State Core Group Member-in MP Official Candidate puanna hun a nei a ni.
Pu Lalramtiama chuan, "Lok Sabha MP Inthlanpui atana BJP Official Candidate Pu Vanlalhmuaka chu Mizoram MP ni turin lawm takin BJP Mizoram State Office ah kan puang a, Mizoram leh mipuite'n malsawmna kan neih theihna tur leh Mizorama Party hrang hrangin MP Candidate kan neih ho zingah chuan MP Mizoram tana ṭha ber tur kan nei a ni, a ti a, Mizoram Sorkar leh Sorkar hnathawk te, ṭhalai te tana hnathawh tur tam tak kan neih theihna turin BJP Mizoram-in MP Official Candidate kan neih Pu Vanlalhmuaka hi min Vote pui turin Mizoram mipuite ka sawm a che u a ni," a ti.
Pu Vanlalhmuaka BJP Mizoram Lok Sabha MP Official Candidate chuan thusawina hun neiin, "NE State-a Kristian State kan tih ho ah BJP leh Tualṭo Party-te Sorkarna a awm zel a, chung State-a kan thawhpuite nen chuan MP inṭawm an nei mai a, keini State ah erawh BJP te chuan thawpui neilovin keimahni in kan ding dawn a ni. Nimahsela vawiinah hian Mizoram mipuite ka ngen duhna che u chu; Central ah ngampa tak leh huaisen taka Mizoram mamawh kan sawichhuah theihna turin BJP MP hi a pawimawh a, MP kan neih tawhte hmalakna en in BJP MP emaw, BJP leh a thawhpui MP an nih loh chuan thil tih a har hle a ni tih a chiang a ni. Chuvangin Mizoram tan, Mizorama Sorkar mek tan, Mizoram mipui tan BJP MP neih hi a pawimawh hle a ni," a ti.
Pu Hmuaka chuan, "Mizoram MP ka nih chuan Mizoram tana hma ka lo lak tawhna te kha a taka tihhlawhtlin a nih theih nan hma ka la dawn a, kan State Ramri chungchang ah pawh Mizoram CM ka thlawp ang aia nasa in hma ka la thei dawn a ni. Tunah hian MP Candidate ṭha tak tak Party dang dangin kan nei hlawm a, mihring mihrinna ah chuan kei aia fel te an ni hlawm ngei ang. Nimahsela vawiina Mizoramin MP Mizoram tana kan mamawh erawh chu Mizoram mamawh sawichhuak thei MP a ni thung a, BJP MP Mizoramin kan nei a nih ngat chuan Central ah Pathian zarah BJP kan Sorkar leh ngei dawn bawk avangin Mizoram mamawh sawi chhuak thei tur erawh chuan kei aia nawrchhuak thei chu an ni lo thung dawn a ni. Chuvangin Mizoram-in sum leh pai leh thil danga kan harsat mekna te sutkian a nihna turin min thlang tling ula, kan thusawi hi a takin mipuiin a rah kan seng ngei dawn a ni," a ti.
Pu Hmuaka chuan sawi chhunzawmin, "Chumai bakah Mizorama MP ka lo ni a nih chuan Kristian State leh Kristian MP Lok Sabha aṭanga tling tlemte zinga mi ka nih dawn a vangin Central hruaitute khuan Minister chanvo ropui tak hial min pek ngei a rinawm a, chuvangin Mizoram mipuite tun ṭum Lok Sabha MP inthlanpui lo awm tur hi ngaihtuahna fim tak hmang chungin Party sawi lovin, Mizoram tana hna ṭha tak ka thawh theih nan min Vote ṭheuh turin ka sawm vek che u a ni e," a ti bawk.
He hunah hian Party hruaitu ṭhenkhat hnen aṭanga thusawi hun neih a ni bawk.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: