Party inrelbaw;na fel lo-ah mawh ka phur

PARTY FOUNDATION DIK A PAWIMAWH: Er. Rohmingliana, MLA

Aizawl | Feb 9, 2024: Vawiin ni 09.02.2024 chawhma khan Mizo Hnam Run chhung inkhawm neih a ni a. Thusawitu Pu Vanlalzawma, MNF Vice President chuan party inrelbawlna fel tawk lovah mawhphurtu a nih thu a sawi.

Pu Zawma chuan: "Party inrelbawlnaah in (party worker-te) duh angin thil kal lo tam tak a awm. Heng zawng zawng hi ka mawh a ni," a ti a. MNF-a a awm vanga a nih phak loh tur an nih dan leh dinhmun sang tak tak a chan thusawiin, "MP leh MLA ka nih chhan te, Party Elected OB kan nihna zawng zawngah lawmthu ka sawi," a ti a. Tunah chuan party-a mi hman tlak zawkte kianin chawlh ve a duh tawh thu a sawi bawk.

Er. R. Rohmingliana, MLA (Member - National Core Committee, MNF GHQ) pawhin thu a sawi a. In sa turin a foundation a pawimawh tiin, "Hetiang bawk hian Mizorama political party-te pawhin foundation an nei veka kan chhutchian a ngai," a ti.

"Congress party chu vai rama intan a ni a. Central-a an hniam chuan Mizoramah pawh an hniam zel. BJP pawh Congress ang tho an ni. Vawiina Mizoram sorkar kengtute hi eng ang nge an nih kan hriatchian a pawimawh. An foundation chu party hrang hrang kalkhawm an ni a. Founder president pawh an nei lo. An MLA-te pawh inthlan dawna an sawm khawm chawp an ni a, an kal thui vak ka ring lo.

"MNF chu Mizopa chhul chhuak, Mizorama din. Ram leh hnam tan - 'Pathian leh kan ram tan' tia din a ni. Tluk sawp lai awm mah se, engtik niah emaw chuan a thochhuak leh ang. MNF chu a foundation a dik avangin party dangte chhungrila inbeihna ang hi a awm ve lo. A foundation a that hle rual hian a dawttua hruaitu turte kan pawimawh bawk a ni," a ti.

Er. Hmingtea chuan thangtharte zingah Mizoram hi chhe lailet dera inzirtirna a awm hi a pawi hle, a ti a. "Kristian kan nihna hi kum za awrh chauh a la ni. Vawiina an tehkhin thin chu ram changkang leh state upa tawhte an ni. Keini chu 1986-ah state kan ni ve chauh. Heti chung hian tunlai technology hmasawnna kan nei ve vek, infrastructure lian tam tak kan neite hi a ropui hle. Tute nge a chhe lam zawnga zirtirtute hi kan ngaihtuah chian a ngai.

"Thil hi chhutchian thin ni se. Mi thu leh hla awih ngawt zel lovin - Sorkar kalta khan eng development nge a thawh? Tun sorkar hian eng hmasawnna nge an kalpui dawn tih hi ngun taka kan chik a, kan zirchian a ngai a ni," a ti bawk.

He hunah hian Legal Board atangin Pu J. Malsawmzuala chuan tunhnai thil thleng chungchang report pe a. Inkhawm hi Pu Vanlalruata Ralte, Vice President Ex MNA-in a kaihruai a. Pu Lalpianfela Chawngthu, Secretary MNF GHQ-in hunserh a hmang bawk a ni.