Lt. Col. Clement Lalhmingthanga'n Champhaia deptt hrang hrang hotute kawm

Aizawl | February 6, 2024: Vawiin khan Champhai South Bialtu MLA, Lt. Col. Clement Lalhmingthanga chuan Circuit House, Champhai ah Sawrkar department hotute kawmin February ni 19 a Budget Session an neih tura Champhai District leh Department hrang hrang mamawh te sawiho chu a ngaihpawimawh thu a sawi a, kawng hrang hrang a hmasawnna tura an ngaihtuahna te uluk taka seng turin a chah a ni.

Champhai South Bialtu MLA chuan hmasawnna hna an thawh theihna tur chuan Department hrang hrangte an pawimawh thu a sawi a, sawrkar tak tak chu anmahni an nih avangin an pawimawh hle tih sawiin an lo tawnhriat tawh atanga tha nia an hriat te hmanga finchhuah tura a duh thu a sawi bawk. Sawrkar atanga Department hrang hrang hnuaia hamthatna dawng tura thlan te chu pe satliah ngawt lova a hmunah kalchilh a, dawng tlak an ni em tih enfiah thin turin a chah a, chu chu hmasawnna tak tak kawng pawimawh tak a nih thu a sawi a, a dawng awm takin dawng si lova, dawng awm lovin dawng tam tak awm thin chu tihbo a tul thu a sawi.

Department hrang hrangte'n hmasawnna hna an thawh kawngah midang thawh tura dah mai lova, mahni a thawhchhuah tum theuh turin a chah a, vawiina an hun hman hi an inhmelhriatna chauh nimahse hma an la ho nghal dawn tih a sawi a, Budget Session thlir chunga Department hrang hrangin an mamawh leh Champhai ah hmasawnna chak zawka kalpui a nih theihna tura ngaihtuahna senga theih tawp chhuah turin a sawm a ni.

He hun hi Pu M. Misael, Addl. DC, Champhai kaihhruainaa hman niin Department hrang hrang hotu kalkhawm ten Champhai hmasawnna tura tul leh pawimawh hrang hrangte an thlen bawk a ni.