LBS KIA-in Sonet thar tlangzarh; Pakua an hralh nghal!

Aizawl | Feb 6, 2024: Kia Motors-in India ramah Sonet car a hlawhtlinpui hle a, a thar tichhuakin vawiin khan LBS Kia chuan an showroom, Falkland Vengah an tlarzarh a, pakua an hralh chhuak nghal.

September 28, 2022 khan LBS Kia-in Mizoramah Kia car a hralh chhuak tan a, Sonet lei hmasa ber Anti-Corruption Bureau Additional SP Pu B Laldinngheta'n Sonet thar khuh a hawng a, mipui nghahhlelh a nih thu sawiin a neitute tan hlimna leh lawmna thlen ngei turin duhsakna a hlan.

Kia Motors-in 2020 khan India ramah Sonet a tichhuak a, nuai 3.68 chuang a hralh chhuak a. Kum li hnuah a thar tichhuak lehin Mizoram dealer LBS Kia chuan a hlui an hralh tawh leh an tlangzarh ruala pakua an hralh leh a vaiin Sonet 204 an hralh chhuak tawh a ni.

Pu Dingngeta chuan, "Mizote hi sumdawnna kawngah professionalism kan tlachham deuh niin an sawi thin a, hemi kawngah hian LBS Kia hi anmahni dawrtute tan an felin an entawntlak hle a ni. Hetianga car thar tlangzarh a ni thei hi hmasawnna a ni a, chona a keng tel a, taima takin thawk zel ang che u," tiin a fuih.

Sonet thar hi sun-roof neia duan niin petrol hmang chi hnih 1.2 L leh 1 L (automatic) bakah diesel hmang 1.5 L a awm a, duhthlan tur rawng chi hrang 11 a awm a, a man ex-showroom prize Rs 8,20,000 atanga intanin Rs 15,90,000 tleng a awm.

A hlui nen a hmelhmang danglamna tam lo hle mah se thiamna sang hmangin changkang leh awlsam tura thuam a ni. Disc brake vek vuah a ni tawh a, a chhung tinuam tur leh vawng dai thei tur thil bilh telin boss sound system thaa thuam a ni tel.

Kia connect hmangin smartphone atanga thunun leh endik theih a ni a, tunlai thiamna ADAS nei telin chet sual laka veng turin kawng hrang hrangah a khalhtu a pui a, him thei ang ber tura duan a ni.

Sonet hmasa kha India rama an tihchhuah rualin ni khatah 6,523-in an hauh a, mipui lawm a hlawh. A thar hi LBS Kia atanga lei duh tan Rs 25,000 pein hauh lawk theih a ni.