Aizawl | Feb 3, 2024: Vawiin Febuary ni 3.2024 (Inrinni) khan MPCC Treasurer Dr. Lalmalsawma Nghaka chuan Kumthar atana Tuirial, Kolasib leh Serlui biala Congress Block hruaitute nen inkawm hona leh infuihtharna hun a hmanpui.
He hunah hian Dr. Lalmalsawma chuan, sakhaw dang betuten nunna tam tak an chan phahna Uttar Pradesh state-a Hindu Temple Ayodhya January ni 22.2024 (Thawhlehni) ah hawn a ni, a ti a. Madhya Pradesh State-ah Kristian te an chep zual takzet a, Anti-Conversion Law behchhanin Kristian te 500 dawn 2023-2024 January chhungin man an ni tawh, tih sawiin, Kumin 2024 MP inthlan kuma BJP sorkarin Hindu-te Hindu-na chawhthawh an tumna hlauhawm tam tak zingah India pawisa note-ah pawh Mahatma Gandhi thlalak aia Hindu pathian Rama thlalak chuan tir tumin hma an la mek, a ti a, Hindu pathian chuang pawisa hi Kristian te'n Pathian ram thawhlawma kan thawh a ngaih lohna turin Mizorama Kristian te kan tanho hi tihmakmawh a ni, a ti.
Dr. Lalmalsawma chuan, Kolasib District-a Hmunphiah chingtuten Hmunphiah hralhna kawngah harsatna an tawk chu pawi a tih thu sawiin, Sorkarin Hmunphiah lei turin RR Associates, Kamrup Assam thawhpui a, Hmunphiah Ro kg khat Rs.100/- aia tlawm loa lei sak tura ruahmanna a siam chu thil lawmawm tak angin lang mahse Hmunphiah a hringa hralhtu hi tam tak an nih avangin a hralhna chungchangah kum dang aiin harsatna an tawh nasat phah zawk a ni. Himachal Pradesh state-ah pawh kuthnathawktute tana that hmel tak Apple hralhna chungchangah ruahmanna a siam a, mahse kuthnathawktute buaina a siam nasat tak hle avangin engkim hrechiang Congress Party an sorkar phah a ni, a ti.
Dr. Lalmalsawma chuan, nikum 2023 January-Febuary-ah kg khat-ah Rs. 50 a ni zet a, a to hnuah Rs. 60-in an hralh a, kuminah erawh Kg khatah Rs. 34 a ni thei tawk a ni, tih sawiin, Sorkarin hmunphiah man a Ro Kg khat Rs. 100-a a siam chu a ro-a pek tur a nih si avangin hmunphiah hralhtute tan nikum 2023 lama a hringa an hralhna aiin a rate a chhiat zawk avangin kumdang aiin an hlawk lo zawk a, mumal taka a hralhna a awm theih loh avangin kuthnathawktute phurrit a thlen phah a ni. Hei mai ni lo, Aitlang vela Hmunphiah chingtute Hmunphiah chu Assam Police in an keh sak thin chu pawi a tih thu sawiin Sorkarin a rang lama hma laksak thuai turin ka ngen a ni, a ti bawk.
Pu Khawpuimawia, Treasurer, MPYCC pawhin thusawiin, Pathianin roreltu tur mipuite kaltlangin min pe thin a, roreltute hi Pathian ruat an ni tih sawiin, Congress Party pawh a hun taka ram leh hnam tana thawk tur Pathianin min pe thin, a ti a, tunah pawh hruaitu tha min pe a, min la pe zel ang. Mi tam takin 2023 inthlanah enchhin sorkar Mizoramah siam ngei an duh a, kan enchhin mek, sorkar tha tak kan neih ngei pawh kan beisei. Amaherawh chu Mizoramah enchhin tur thlang mah ila, Centralah erawh chuan kan ram, kan hnam leh kan sakhua humhim nan BJP paihthlak an duh vek, chumi ti tur chuan BJP nena thawkho lo tur Congress MP kan neih a ngai, chutiang tur chuan Mizorama Kohhran, NGO, Political Party turin ka ngen che u, a ti bawk.
He hunah hian MPCC General Headquarter atangin Pu S. Thangliankhuma, Organiser, ADCC, Pu Laltlankima, Secretary, MPYCC, Pu Lalfela, MPYCC ten an tawiawm a, Tuirial, Kolasib Block-a hruaitu te bakah Unit hruaitu te an tel bawk.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
.
Post a Comment
He post chungchanga i ngaihdan lo sawi ve rawh: