I NATNA CHUAN PATHIAN BELHTIR CHE RAWH SE

_I Nundan Thlirlet La_

Rick Warren

Feb 6, 2024

"In ritphurhte chu inchhawk tawn rawh u, chutichuan Krista dan thu chu in zawm a ni ang.” Galatia 6:2

Tuarna chuan kan nun a tidanglam a. Mahni hmasialna atangin natna tuar ve mekte veina i neih phah thei a ni.

I tawrhna chu mi dang hnaih lehzual nan tangkai takin i hmang hlauh thei. I nat chhan te i hriatchian phei chuan, hmangaihna thuk zawk i nei thei ang a, mi dang nena inlaichinna nghet zawk leh khawtlang hmangaihna te i nei thei ang. Na tuar i inhuam phei chuan, mi dangte nen inlaichinna nghet i nei thei ang. 

Nupa pathum an fa an sun avanga inthen an awm a. Miin lusunna an tawrh dan hi a inang vek lo, nupa thlengin an inthen phah tlat mai a ni. 

Kan fapa kan sun khan, kei leh ka nupui Kay-i chuan kan tawrhna chu inthen nan hmang lovin inhnaih zual sauh sauh nan hmang ang tiin thutlukna kan siam a ni. Kan tawrhna avang chuan inmawhchhiat tha kan ti lo va. Kay-in a fa a sunnaah chuan, a kiangah kalin a changin ka kuah a, a chang chuan a bulah ngawi rengin ka thu a. Tawngkam dang engmah sawi tur kan hre lo.

Kan tuar chu a nat poh leh, sawi tur kan vai a ni.

Kan pawlho chu Matthew-a thih khan an lo kal a. Anni chuan, "Kan tlaivar pui dawn che u a, nangmahni ngawtin kan dah dawn lo che u a. In kiangah kan awm dawn” an ti a nih chu. Thufing pui pui fah min tum hran lo. Tel ve rawngbawlna kha an rawn thawk tawp mai a. Kan thutthlengah leh kan chhuatah te chuan an mu ve tawp mai a ni.  

Kan Bible chuan, "In ritphurhte chu inchhawk tawn rawh u, chutichuan Krista dan thu chu in zawm a ni ang,” a ti a ni. Galatia 6:2

Mi an lusun laiin chawh hlim an ngai hran lo. Chu ai chuan, an lusunnaah chuan kalin, an tuarna chu va hriatthiampui zawk rawh. Mi dang tawrhna kan hriatthiampui hian inpawhna tha te, inlaichinna nghet leh tlo zawk a siam daih a ni.

Ngaihtuah zui atan

* Miin tawrhna an paltlang laiin fuihna thu ai chuan i va tel vena chu engvangin nge pawimawh nia i hriat ? 

* Tuarna chuan i nunah danglamna eng nge a thlen? Engtiangin nge mi dang a hlattir emaw a hnaihtir che?

* Engvangin nge inlaichinnaah hian i tuarlai chuan tuar zel tura inhuam aia mahni inkharkhip chu a awl zawk nia i hriat?

*[Lettu: Sangpuia]*