2nd MAP-ah Training for Mizoram State Disaster Response Force tan

Lunglei | February 6, 2024: Vawiin chawhma dar 10:00 khan 2nd Bn MAP Hqrs.Luangmual,Lungleiah kar hnih (two Weeks) awh tur “Training for Mizoram State Disaster Response Force” hawnna inkhawm tawi neih a ni a.He hun hi Pu PC Lalchunglura, Jt. Director(Ops), DM& R chuan kaihruaiin, Pu C.Lalthanmawia IPS,DIG(SR), Lunglei chuan khuallian niin hun a hman pui a, Training hawnna thuchah a sawi bawk.

Khuallian Pu C.Lalthanmawia chuan 2nd Bn MAP Hqrs-a hetiang training pawimawh tak DM& R Dept. leh 2nd Bn MAP Hqrs tangkawp ten an buatsaih hi lawmawm a ti thu sawiin, Trainee te chu khuarel chhiatna lo thlen palh a, chhanchhuahna leh chhandamna hna thawktu tur an nih avangin, he kar 2 chhung an training-ah hian thiamna tak tak pawhchhuak ngei turin, rilru pe tak leh thahnem ngai taka training turin a chah hlawm a, bel taka an Training course te an zawh theuh theih nan duhsakna a hlan hlawm bawk a ni.

Pu Francis Lalnuntluanga Ralte, Commandant, 2nd Bn MAP Hqrs pawhin thusawina hun hmangin,2nd Bn. MAP Hqrs. chhunga SDRF hmanrua neih ang ang te, an endik a, siam that ngai leh thawmthat ngai te chu siam that vek a ni a. Nikum Furpui chhung zawng pawh khan Quick Response Force(QRF) a tan company khat chu inralringa dah reng an ni thu sawiin, kum 2021 April thla a Lungleia kangmei chhuakah pawh khan 2nd Bn MAP Hqrs-a SDRF te an thawhhlawk hle thu a tarlang bawk.Tunah hian Mizoram Armed Police zingah SDRF Training tawh mi 459 an awm mek a, 2nd Bn MAP Hqrs. hnuaiah hian 100 chuang an awm mek thu tarlan a ni bawk.

Dr.Lalrokima Chenkual, Deputy Director(Trg), DM&R in Training Course leh Training kalpui dan tur tlangpui sawihawnna hun a hmang a.Pu Kaste Romalsawma, Asst.Director (Ops), DM&R in lawmthu sawinain vawiin Training hawnna inkhawm tawi chu a titawp ta a ni.