MZP-in Rajya Sabha MP K Vanlalvena chunga lawmthu sawina hun hmang; MP-in FMR ṭhiah tumna a duh loh thu Parliament-a sawichhuah tum!

Aizawl | Jan 16, 2024: Vawiin ni 16th January, 2024 (Thawhlehni) chhun dar 12 khan Mizo Zirlai Pawl (MZP) General Headquarters, Aizawl chuan kum 2024 atana MZP Pisa Pui hawnna leh ram leh hnam tana a thawh that avanga Rajya Sabha MP Pu K Vanlalvena chunga lawmthu sawina hun MZP Conference Hall-ah buatsaih a ni a. He hun hi MZP Vice President Pu C Lalremruata’n a kaihruai.

He hunah hian MZP President Pu H Lalthianghlima chuan thu sawiin, hunpui avanga hun eng emaw chen Pisapui khar a nih hnuah kum 2024 atan hawn leh a ni ta a. Zirlaite leh ram leh hnam tan a tul apianga hmala turin pisapui chu hawn a nih thu a sawi.

MZP President chuan, "Mizoram chhunga hmasawnna hnathawh hrang hrang leh zirna tih hmasawn nana hmalakna hrang hrangte uluk takin kan vil zui dawn a. Zirtirtu mahni post-a awmlo te, an post-a an awm theih nan hma kan la dawn a ni” a ti.

MZP President chuan, Ram leh hnam tana huaisen taka ding ngam Mizoram MP Pu K. Vanlalvena chuan chawimawi a phu takzet a. A hnathawh hrang hrangte avangin MZP ten lawmthu sawina a hlan a ni, a ti a. Mizoram-in Technical zirna in kan neih hlu ber NIT Mizoram-ah thil fel tawklo a awm avangin naktuka Convocation an neih tur chu dodal a ni dawn a ni a ti.

Rajya Sabha MP Pu K Vanlalvena chuan thu sawiin, MZP-ten a hnathawh avanga lawmthu sawina an hlan chu lawmawm a tih thu a sawi a. Mizoram leh Chin State Zofate zalen taka inkalpawhna Free Movement Regime (FMR) tun hnaia hlih tumna a awm chu a pawm loh thu sawiin, Parliament session hmasa berah pawh sawichhuah ngei a tum thu a sawi.

“British-in Zofate min then darh a, a pawi kan tih em em laiin tun hnaiah kan inkalpawhna ber chu hung tum a ni leh ta a. India hian ramri hung a duh a nih chuan Mizoram leh Chin State inkar ni loin, China leh Pakistan ramri hung mai rawhse” a ti a, a tawp thlengin kan dodal zel ang a ti bawk.

He hunah hian MZP chuan, Rajya Sabha MP Pu K Vanlalvena chu Mizo hnam chhan nana India Parliament-ah vawi duailo au chhuak a, ram leh hnam tana theihtawp chhuaha hma a lo lak tawhna avangin lawmthu sawina thuziak leh tawlh loh puan an hlan a. Network for Unity Association Mizoram leh Mizoram - Myanmar Coordination Committee te pawhinMP hnenah hian chawimawina thil pek an hlan bawk.