NIELIT leh MZP ṭangkawpin Job Fair buatsaih

Aizawl | December 13, 2023: Vawiin December 13, 2023 khan Aijal Club Park-ah NIELIT leh Mizo Zirlai Pawl (MZP) General Headquarters, Aizawl buatsaihin ṭhalaite tan hna zawrhna runpui Job Fair neih a ni.

He hunah hian Information Communication and Technology (ICT) Department Secretary Lalramsanga Sailo IRS chu khuallian niin, Labour, Employment, Skill Development and Entrepreneurship (LESDE) Department Commissioner Angela Zothanpuii chu khualzahawm a ni.

Khuallian Lalramsanga Sailo chuan, "NIELIT Job Fair buatsaih theih a ni chu lawmawm a tih thu sawiin, firm hrang hrang inphote inpekna lawmawm a tih thu a sawi bawk.

Ṭhalaite chu Employment Exchange in sawrkar hna ruak a phochhuah ṭhin chu hmang ṭangkai turin a chah a. "Degree Certificate mai piahah hian soft skill a pawimawh a, mi biangbiak thiamna leh mahni inphochhuah thiamte a pawimawh," a ti a. "Mahni ṭhatna te phochhuah thiam a pawimawh," a ti a, "Hindi ṭawng thiam a pawimawh," a ti bawk.

Khuallian chuan, NIELIT leh MZP buatsaih Job Fair chu hna zawng mekte leh thawktu zawngtute'n ṭangkai taka an hman ngei theih nan duhsakna a hlan bawk.

NIELIT Job Fair-ah hian Mizoram chhunga leh pawn aṭangin firm hrang hrang 15 in stall hawngin an inphochhuak a, heng firm inphote hi Automobile, Construction, IT, Software firm, Telecom leh consultation firm te an ni.

Job Fair-ah hian hna zawng mekte tan hna awm theite kawhhmuhin hna ruak awmte an inhrilhhre bawk.

He hunah hian Aizawl khawpui chhunga zirlai leh ṭhalai hna zawng lai ṭhahnem tak an fuankhawm a, an hlawkpui hle a ni.

Job Fair hawnna hun tawi hman niin, he hun hi NIELIT Aizawl-a Scientist 'E' F Lalrinawma'n a kaihruai a, khuallian, khualzahawm leh MZP Vice President C Lalremruata te'n thu an sawi a ni.