Naktukah NH 6 Bualpui Quarry leh Seṭhawn inkar kawngpui khar dawn!

Aizawl | Dec 5, 2023: Vawiin khan Sr Superintendent of Police, Kolasib District Pu Lalrinawma Traite chuan Mizoram State sawrkar Notification No. B. 12021/18/94-TRP dt. 25.09.2007 leh Section 115 of Motor Vehicle Act 1988 (Act No. 59 of 1988)-in thuneihna a pek angin lirthei chet vel dan turah a hnuaia mi ang hian thupek a chhuah.

"National Highway 6 kawng chhe zual thawm ṭhatna hna thawh mek chu chak lehzuala thawh a nih theih nan dt. 06.12.2023 (Nilaini) aṭanga thu leh awm hma chu NH 6, Bualpui Quarry (Mandir bul) aṭanga RTP Farm, Seṭhawn bul kawngpui hi ni tin chawhma dar 11:00 AM aṭanga chawhnu dar 02:00 PM inkar chhung chu motor eng chi mah tlan phal lohva khar ṭhin a ni ang.

"He kawngpui siam ṭhat hna thawh dan hi lane (01) khat hi thawm ṭhat hna thawh reng tur a ni a, lane lehlama motor hi veivak reng thei tura ruahman a ni. He darkar thum (03) kawng khar a nih chhung hian motor zawh lam lane-a lirthei lian rit tak takte'n kawng an dai chhiat avanga harsatna nasa zawk awm thei ven nana hemi lane thawm ṭhat hna hi thawh ṭhin tur a ni ang.

"He thupek zawm lo chu 177 MV Act hmanga hrem an ni ang. He thupek hian ṭul bik thila Police, Fire Department, Ambulance leh Magistrate-te chet velna a huam lo ang.

"He thuchhuah chungchanga harsatna tawk emaw, report neite chuan OC Kolasib PS (Ph. No. 9862786385) / IC Traffic Cell (Ph. No. 9862306914)-ah biak theih reng a ni."