Kohhran Thianghlim 'Jerusalem Khawmpui vawi 35na' nei

Aizawl | Dec 28, 2023: Kohhran Thianghlim te chuan kumtina an lo hman ṭhin; Jerusalem Khawmpui chu Solomon's Temple, Kidron Valley, Chawlhhmun-ah a ṭum 35-na atan, December ni 24 aṭanga December ni 27 thleng an hmang leh a ni. Ni 3 chhung hi inkhawmna hun hman niin, he inkhawmpui thupui atan hian 'Lawmin i zai ang, lal thar a piang ta' tih chu hman a ni. A ni 4 na (ni 27) erawh damlo leh a mamawh apiangte hman atan 'Thisen pek runpui' neih a ni. Jerusalem Khawmpui hmang tur hian Zoram kiltin leh Zoram pawn aṭang pawhin palai ṭhahnem tak an kalkhawm a ni.

A ni khatna inkhawm hi Pu Vanlalfaka'n kaihruaiin, kum 2021, October ni 10 a chatuan Pa angchhunga chawl tawh tura muhil ta, Kohhran Thianghlim dintu Dr. Lb Sailo zahna leh hriatrengna minute 1 ngawi renga dinna hun hman a ni. Solomon's Temple Choir ten opening song 'Lalber khumtir rawh u' tih hla an rem a. Fellowship hun hman zawhah Pu Kawlhnuna leh Missionary. C. Lalhmasawna te'n Pathian thuchah ngaihnawm tak an sawi a ni. 

A ni hnihnaah Pu Rex Lalchungnunga'n inkhawm kaihruaiin, Kohhran Thianghlim Education Department te'n Competitive Exam bika zirlai tiṭhate chawimawina hun an hmang a, hlawhtlinna changte hnenah lawmpuina thuziak leh pawisa fai an hlan a ni. Fellowship hun hman a nih hnuah Pa Malsawmtluanga'n 'Thuthlung bawm awmna Solomona Temple' chanchin tih thupui hmangin Pathian thuchah ropui tak a sawi a ni. 

A ni thumna inkhawm hi Pu JC Malsawma'n a kaihruai ve thung a. A duh apiang dinna (fellowship) hun thawl tak hawn a ni. 'Kohhran nihna dik takah i kir leh ang u' tih thupui hmangin Pu V. Lalengzauva'n Pathian thutak a rawn sawi a. Executive Committee Chairman, Pi Lalzirliani'n 'Lal Isua kraws-ah i kir leh ang u' tia kohhran mipuite fuih chungin Jerusalem Khawmpui vawi 35-na chu a khar ta a ni.

Ni 27 (Nilai ni) hian Kohhran Thianghlim ṭhalai, Youth Evangelical Front te chuan Aizawl Civil Hospital a hman atan thisen Unit 202 an pe a. Mamit Division huam chhunga ṭhalai mipa 142 leh hmeichhia 60 ten thisen an pe a ni.

.