Chhamb Battle Honour Day hmang

Aizawl | Dec 5. 2023: Vawiin ni 5.12.2023 khan Ex-Fighting Fifth Association (EFFA), Mizoram ten CHHAMB BATTLE HONOUR DAY vawi 52-na ZTS PICNIC SPOT, Kelsih ah an hmang a, Pu C. Lalrambuatsaiha, President, Mizoram Journalists Association chu khuallian niin, Sainik Welfare and Resettlement Director Lt. Cdr Lalnuntluangan he hun hi a hmanpui bawk.

Khuallian Pu C. Lalrambuatsaiha chuan Ṭhalai te tan sipai a ṭan tam ṭha a tih thu leh Mizo ten sipai officer kan la nei tam tawklo a ti a, hemi lama hmala tu pawimawh tak Mizoram a Sainik School tih changtlung zel a pawimawh tih a sawia, hei bakah hian Nagaland pawhin an mahni puala Regiment an neih ang bawkin Mizo ten Mizo Regiment neih ve vat ṭul a tih thu a sawi tel bawk.

5th Bn. Assam Regiment atanga pension chhuaka intelkhawm Ex-Fighting 5th Association (EFFA) ten an regiment-in kum 1971-a India leh Pakistan Indonaa Chhamb hmuna an chet ṭhat avanga Honour of Battle an hmuh hriatrengna hi kum tin December ni 5 ah an hmang thin a ni.

Ex-Fighting 5th Association (EFFA) –ah hian sipai bangte bakah indonaa pasalthate hmeithai, an pasalten an boralsan tawhte pawh an tel a. Kumin hian an member boral Pu Zokaichhunga, Vaivakawn leh kum 1971 indo naa sipai 24 thi te sunna leh hriatrengna hun an hmang nghal bawk a ni.

Covid-19 leh harsatna dang avangin kumin May 22-25 inkar khan W. Bengal a Kalimpong hmunah kum 1971 India-Pakistan hnehna hriat rengna kum 50 na golden jubilee hman a ni a, Mizoram aṭangin EFFA member 60 chuang an zuk tel ve bawk a ni.