ZPM Ṭhalaiin SASCI hnuaia hnathawh chhuizui tum!

Aizawl | October 5, 2023: ZPM Party Ṭhalai Vice President Zoramchhana Sailo chuan vawiin chawhnu dar 2 khan Aizawl Press Club-ah Thuthar thehdarhtute kawmin, MNF Sawrkarin SASCI hnuaia hnathawh mek leh thawh turte enzui an tum thu a sawi.

"MNF sawrkâr hian tun hnaiah an duhsak zawng sum insiamna leh vote zawnna atan Central sorkar atanga  SASCI sum kan puk, mipui leiba hi an hmang nasa niin ZPM Thalai chuan kan hria,"a ti a.

"Tunah hian MNF sorkar chuan ram hmasawnna aiin Election Model Code of Conduct-in min phuar hmaa SASCI sum puk hman a nih theihna turin beihpui a thlak mek a, heng hnate hi inthlan puan hunah pawh hna kal mek ang a awm thei turin inthlan puan hmain hna hi pek chhuah rum rum a ni a, inthlan puan hmaa bawngthuthlawha lo cheh hman hrim hrim an tum a ni." a ti bawk.

ZPM Ṭhalai Vice President, "Tun hnaiah ni 29 August, 2023 khan restricted tender hmangin PWD hnuaiah  SASCI hna 25, Rs vbch 82.7 man approve a ni a, ni 5 September, 2023 khan PWD hnuaiah vek, restricted tender hmang vekin hna 4, Rs vbch 11.56  approve a ni bawk. Tin, ni  8 September, 2023 khan PWD hnuaiah vek hna 77, Rs  vbch 296.41 man approve a ni bawk.Heng hi a vaiin hna 106, Rs vbch 390.67 a ni." a ti.

"SASCI hi hmasawnna ruhrel tha leh rotling siamna tur atâna leh, nakina sum siam chhuak thei tur hmasawnna din a nihna tura Central sorkarin a ruahman a nih lai a, duhsak zawng sum insiamna leh vote zawnna ang hrima MNF sawrkarin a hmang hi pawi kan ti hle a ni. Chief Minister-in India ram State zinga leiba ngah ber kan ni chunga ni 16.1.2023-a SASCI leh SEDP sum nuai 300 hmanga MNF candidate-te bial an vilpui tur thu a sawi kha mipui zahlohna leh sum hman khawlohna lian takah ZPM Thalai chuan kan ngai a ni. Unaute sum kawla inchhal hial, Chief Minister Zoramthanga kaihhruaina hnuaiah hian MNF party-te Zoram mipuite hi sum hmuhna atan leh sum puka atan chauh min duh niin ZPM Thalai chuan kan hria a ni," a ti bawk.

ZPM Ṭhalai VP chuan, "Tunhnaiah SASCI sum hmanna tur Public Works Department hnuai ami, Mizoram sorkar-in a pawmpuite hi  a letter no chu No. B.12026/17/2023-PWD(T)/RT; dated 29th August, 2023; No. B.12026/10/2022-PWD(T)/RT, dated 5th September, 2023; No. B. 12026/4/2019-PWD(T), dated 8th September, 2023 an ni a,  hna 106 cheng vaibelchhe 390.67 man restricted tender hmanga chhuah a ni hi ZPM Thalai chuan kan dem takzet, a ti a. "Heng hnate hi sum insiam luatna avanga Restricted tender chhuah a nihna tura inkaihhruaina dan kalha chhuah ni ngeiin ZPM Thalai chuan kan hria a, nasa lehzualin kan chhui zui dawn a ni," a ti bawk.

MNF sawrkâr hnuaiah SASCI hi vote zawnna hrim hrima hman a nih avangin he SASCI hnuaiah hnathawh hi a chhe hlawm hle a, ZPM Ṭhalai chuan SASCI hmanga hnathawhte hi uluk takin a vil dawn a, SASCI hnathawh chhe lutuk avang hian ZPM Ṭhalai chuan Lok Ayukta-ah pawh thubuai a lo thehlut tawh a, SASCI hmanga hnathawh lo awm tawhte leh tun inthlan dawna SASCI hna pek chhuahte hi ZPM Ṭhalai chuan uluk taka en dikin a vil zui dawn a ni. SASCI hmanga hnathawh ṭha lo leh kalphung dik lo a awm a nih phawt chuan a mawhphurtute'n rorelna dik tak an chan theihna turin ZPM Ṭhalai chuan a tawp thlengin hma a la zêl ang, a ti bawk.