Oct 9 aṭangin kawng chhe siam ṭhat nan lirtheia eizawngte tlan loh tum

Aizawl | October 5, 2023: Mizoram chhunga Lirtheia eizawngte - Joint Action Committee for Pliable Road chuan October 9 aṭangin kawng chhe siam ṭhat a nih nan lirtheia ei zawngte'n tlan loh an tum!

Mizoram Trucks Owners Association President B Lalzarzova chuan he thu hi vawiin khan Aizawl Press Club-ah thuthar thehdarhtute kawmin a sawi a ni.

Joint Action Committee for Pliable Road (Sairang to Vairengte, Kawlkulh to Hliappui, Kawlkulh to Tuichang, Aizawl to Imphal Economic Corridor) ah hian Mizoram Truck Owners Association, Mizoram Truck Drivers Association, Mizoram Oil Tanker Drivers Association, Mizoram Tipper Drivers & Owners Association, Kolasib District Driver Welfare Joint Action Committee te an tel a ni.

Mizoram kawng chhia chuan an eizawnna leh nunphung a nghawng thu an sawi a, lirthei chetsualna a thlen nasat thu leh, hei hian chhiatna nasa tak a thlen thu an sawi bawk.

Truck Owners Association hnuaiah hian Motor 400 chuang, Gas-ah 64, Tanker 75, Aizawl Districtah tipper 100 vel an awm a ni.